Mauricio Pochettino chuan club enkawl leh vat a duh thu a sawi chhuak a, club thenkhat beng a verh hle.

Season kal mekah Tottenham Hotspur chuan beisei an phak loh em avangin thla hmasaah khan Spurs chuan manager Maurico Pochettino chu an ban a. An ban hnu lawkah a hmun ruak luah tur hian Portuguese coach Jose Mourinho chu an ruai zui leh nghal a ni.

Argentine coach Mauricio Pochettino chu hmanni lawka an manager Unai Emery bantu Arsenal nen an sawi zawm deuh a, engmah chiang erawh a awm rih lo a. Hei bakah hian Manchester United, Bayern Munich leh Real Madrid te nen pawh an sawi zawm mek a ni.

Kum 47-a upa Pochettino chuan, “Ka tan chuan club hrang hrang leh hna hrang hrang duhawm tak tak thlan tur a awm nual mai a. Tun dinhmunah tak hi chuan season nga leh a chanve zet hun ka lo hman tawhna Tottenham Hotspur ka chhuahsan deuh chiah a ni a, ka rilru hi dah thawl ve deuh rih ka duh,” a ti.

“Tuna ka tum ber chu ka rilru hi ngai awhtir leh a, a hma ang bawk a ngaihtuahna tha taka sen leh theih kha a ni a. Europe khawmualpuia eng club emaw ber enkawl leh hi ka duh ber chu a ni,” a ti bawk.

A sawi zelnaah, “A nihna takah chuan ka tan hian kan ram Argentina lama hna zawn chu harsa ka tih ka ring a. Chutih rualin kan chhungkaw tana tha zawk tur a nih chuan mahni rama hna han thawh chu ka hnial chuang lo ang,” a ti a.

“Hahdam takin hun rei vak lo tal pawh han awm phawt ila, eng thil nge rawn thleng zel dawn tih chu a la hriat mai dawn a. Ka chunga thil thleng hi chiang taka ngaihtuahna hun pawh ka la nei mumal lo a. A tir takah kha chuan Argentina rama kir a, ka chhungte bula awm a, thiante leh chhungkhat lainate bula hun hman kha ka rilruah a awm a. Tunah chuan Europe khawmualpuia awm a, ka awm zel dan tur tih fel vat hi ka rilruah a lian leh ta zawk a ni,” tiin Pochettino chuan a sawi.