Club dangin player an lei loh hunah title kan beisei ang: Mourinho

08th December 2018, 07:12PM

Jose Mourinho chuan Premier League trophy chu an tan lak a harsat rih tur thu sawiin, club dangte’n player an lei belh zel loh hunah beiseina an neih ve theih tur thu a sawi.

Manchester United chuan 2012-13 hnuah Premier League title an la leh thei ta miah lo a, tun season-ah lah bul an tan tha lo hle a, Mourinho pawlte chu match 15 khelh tawhah pariatnaah awmin, hmahruaitu Manchester City aiin point 18 ngawtin an hniam tawh zawk a ni.

Red Devils te hian Premier League match hnuhnung paliah chak hmel an hmu tawh lo a. Season hmasaah khan Premier League-ah pahnihna an ni a, champion Manchester City aiin season tawpah point 19 in an hniam zawk a. Mourinho chuan tun season mai bakah season awm zel turah pawh Manchester City te leh Liverpool te’n player an lei belh zel chuan United tan title beisei ve theih a nih loh thu a sawi a ni.

Mourinho chuan, “Eng tikah nge United hian Premier League title kan lak ve leh theih dawn a hriat loh a. Hma kan sawn dan azir a nih rualin club dang than nasat dan hian kawngro a su viau dawn a. Kan chunga awm te hi an tlakhniam loh a, pawisa an hman vak vak reng si chuan kan tan chet ngaihna a awm lo a ni mai,” a ti.

“Player lei tharna atana pawisa an hmang vak vak hi an titawp emaw, Financial Fair Play in an pawisa hmang nasa lutuk tur a khap dai a nih emaw chuan kan inkar zau tawh tak hi tlem tlemin a tihzau ve theih dawn a ni,” a ti bawk.

Portuguese coach Mourinho hian hun eng emaw atang khan Manchester United thuneitute chu player leina atana pawisa hmang tha duh lo tiin a sawisel chho tawh a, tunah pawh an chet chhiat chhan bulpui pakhatah hian a la puh deuh tlat bawk a ni.

Copyright © inkhel.com 2024. All rights reserved.