16 Sep 2020 10:23

bakteaJr.

Mizo tlangval

​Club dang nen pawh inbe mah ila Chelsea ka thlang: Werner

Chelsea forward thar Timo Werner chuan RB Leipzig a chhuahsan dawn khan, club dang nen pawh indawrin inbe ngei mahse, a tawpah erawh a tan Chelsea chu a tha ber a nih avangin a thlan thu a sawi.

Tun nipui bazar tir lam khan Werner hi nasa takin Liverpool nen sawizawm an ni a, Anfield-ah a lut ngei tawh dawn anga a lan hnuah Chelsea rawn langin, hun reilo te chhungin Chelsea hian German forward hi Stamford Bridge lamah an seng lut.

Werner hi Chelsea leh Liverpool lo pawhin an dawr ngeia, mahse a tana tha ber tura a hriat leh, a khelh dan mil ber tura a hriat Chelsea a thlang ta zawk a ni.

Werner chuan club dang hnawla Chelsea a thlan chungchang sawiin, “Leipzig chhuahsan ka tum khan, club hrang hrang nen kan inbia, Chelsea lo pawh club dang nen kan indawra, mahse keichuan club dang chungchang hi sawi tam vak ka duh lo.

“Liverpool te pawh team tha tak an ni a, team dang khelh dan ka mil viau thei bawka, mahse a tawpah erawh Chelsea ka thlanga, ka tana tha ber tura ka rin avangin thutlukna ka siam. An football khelh dan mai bakah, an thil min kawhhmuh hrang hrang avangin Chelsea hi ka zawm.

“Thutlukna siam awlsam lo tak a ni a, mahse ka rilru ka siam fel hnuah erawh ka phur a, ka lawma, ka thutlukna siamah a lung a awi. Thla hnih vel Chelsea-ah ka awm tawha, ka rilru a dam thlapa, kan team pawh a tha hle. Chelsea tana khelh hi a hlimawma, he team-a ka tel thei hi a lawmawm ka ti bawka, he team hi kan chet that ngei pawh ka ring a ni,” a ti.

Manager Frank Lampard nena an inbiak chungchang sawi belhin Werner chuan, “Hun danglam tak kan paltlang meka, manager nen pawh kan indawr lai khan kan inhmu thei lova, he hripui avang hian Chelsea ka zawm hnuah chauh a vawi khat nan kan inhmu.

“Mahse, min call ngun em em a, kan inbe hnema, message pawh min thawn hnema, a khelh duh dan style video pawh in thawn nual. Club thar zawm tur ka nih angin, khatiang hriat kha ka tan chuan a pawimawh em em a, Leipzig-ah khan ka hlima, nuam ka ti em em bawk.

“Ka khelhdan style mil em em team-a luh hi ka tan a pawimawh a, Premier League pawh hi ka khelhdan nen a inmilin ka hria a, a chhan chu engkim hi a ranga, keimah anga player che rang hi chuan space pawh kan nei hnem thin a ni,” a ti.