25 Apr 2019 05:29

inkhel

Clippers-in Warriors an hneh; Jazz-in Rockets an hneh lo

Los Angeles Clippers chuan top seed Golden State Warriors chu an hneh a, NBA playoff series an khelh mekah beiseina thar an neih leh phah a ni.

Lou Williams chu bench atanga lutin a che fuh hle a, point 33 zet mai a score a, Clippers chuan rin kai zawk Warriors chu 129-121 in an hneh theih phah a. Williams hian rebound 4 a lak bakah assist 10 a nei bawk a, Kevin Durant chuan he inkhelah hian point 45 ngawt mai a score a ni.

Williams chuan field attempt 19 a neih atangin 12 chu a thun a, Montrezl Harrell pawhin bench atanga a luh hnuah vawi 14 a shoot atangin vawi 11 a thun a, a vaiin point 24 chu a score bawk a ni.

Point guard Patrick Beverley chuan rebound 14 a la a, series kal mekah 3-2 a ni tawh a, Zirtawpni hian Los Angeles khawpuiah game 6 an khel leh dawn a ni.

Golden State Warriors chuan bul an tan tha hle a, first quarter-ah ringawt pawh point 41 ngawt mai an thun thei a. Mahse, Clippers chuan Warriors defense fuh lo chu an hre fuh chho a, second quarter a nih meuh chuan an point pawh a inrual deuh thuak reng tawh a ni.

Second quarter-ah hian mikhual team chuan NBA champion ding lai aiin point an thun hnem a, an point score dan chu 34-22 niin, half time a thlen chuan Clippers chuan 71-63 in hma an hruai chho tawh a ni.

Third quarter an khelh leh pawhin Clippers bawk chu an chungnung leh nghal a, a tir lamah point 15 in hma an hruai thei nghal mai a. Warriors chuan pawhthlak tumin theihtawp an chhuah chho a; Kevin Durant a che na chho hle a, Clippers chu a umtu an ni leh hman thuak thuak bawk a ni.

Minute 2:40 chauh a awm tawh tihin Durant chuan a dunk a, Golden State chuan 118-117 in hma an hruai a, an inkhel pawh Warriors chuan an thunun ve leh thung tawh a. Mahse, Williams a rawn che ve leh thung a, three-pointer a neih bakah lehlam pawl chu a foul tir a, hemi hnu hian Clippers chuan 121-118 in hma an hruai ve leh thung a ni.

Inkhel boruak a tang hle a, Williams zarah Clippers chuan 125-118 in hma an hruai chho a, minute khat vel chauh khelh tur a awm tawh bawk a. Danilo Gallinari layup zarah point 9 in an sang chho zui bawk a, hun tawpah Clippers hi 129-121 in an chak thei ta a ni.

Hmun dangah James Harden chuan point 26 a score a, Houston Rockets chuan 100-93 in Utah Jazz an hneh a. Rockets hian NBA playoff Western Conference semi final an luh theih phah a ni.

2018 NBA Most Valuable Player Harden zarah Toyota Center-ah Houston chu an chak a, 4-1 in an series khelhah chuan an chak ta a. Houston hian semi final-ah Warriors leh Clippers inkhela chak zawk zawk an hmachhawn leh dawn a ni.