​​Cleveland Cavaliers chak ve leh

08th June 2015, 07:06PM

NBA Final Game 2 ah Cleveland Cavaliers chuan Match hmasa phuba lain Over Time ah 95-93 in Golden state Warriors chu an hneh!

He match hmuhnawm takah hian 4th Quarter a zawh thlengin Team 2 Points score chu 87-87 a la nih avangin Over Time khelh a ngaih phah ta a ni.

Over Time ah hian Cleveland lamin hma an hruai nghal a, awlsam takin an chak mai dawn emaw tihhnuin Golden State lam an rawn che tha ve leh a. Second 10 chauh a awm tawh tihin Cavaliers lamin Point 1 chiahin hma an hruai tawh a, Golden State ball niin Time Out an neih chu hman tangkai ngei tum mahse Stephen Curry a air ball hlauh avangin Lebron James chuan Ball a chang a, Golden state lam an foul vangin a Free throw hlawhchhuah 2 zinga pakhat zawk lutin hun a tawp chawpchilh nghal a. Cleveland Cavaliers chu 95-93 in an chak ta a ni.

Lebron James chuan 39 Points lai a team tan a thawhchhuak a, Timofey Mozgov pawn 17 points leh rebounds 11 lai Cavaliers tan hian a nei ve bawk. Golden state lam tan Klay Thompson chu thawhhlawk ber niin 34 points a nei a ni.

Tunah hian Final Series ah 1-1 nimekin inkhel hmuhnawm tak kan hmu zel rih dawn niin a lang. Game 3 hi Cleveland ah Wednesday hian khelh a ni leh ang.

by- Solomon Parte

Copyright © inkhel.com 2024. All rights reserved.