Class of 2020 a tel thei tur Bryant, Duncan, Garnett leh Bosh

20th December 2019, 08:12PM

Kobe Bryant, Tim Duncan, Kevin Garnett leh Chris Bosh te chu 2020 kuma Naismith Memorial Basketball Hall of Fame-a lak luh theih tura chhawp chhuah zingah an tel.

North American Committee chuan kum thara Hall of Fame-a an lak luh theih tur an thlan tak tak hmain mi 50 hming an chhawp chhuak hmasa a. Kobe Bryant, Tim Duncan, Kevin Garnett leh Chris Bosh te chu chhawp chhuah zinga langsar zual niin, anni pali ringawt hian NBA championship 13, Most Valuable Player award 4, NBA Finals MVP award 5 an dawng tling tawh a, All-Star ah vawi 59 an lan tawh bakah All-NBA ah vawi 40 an thlang tawh bawk a ni.

Kum thar February thlaah khian Chicago khawpuiah A--Star Weekend hun an hmang dawn a, hetah hian finalist te hming chu an puangzar dawn a. April thlaah khian Atlanta khawpuiah Hall of Fame-a lak luh tur Final Four te chu an puang ang.

Bryant, Duncan, Garnett leh Bosh te bakah hian a vawi khatna atan Shawn Marion, Michael Finley, Mark Eaton leh Buck Williams te chu an chhawp chhuak a, a hma pawha an lo chhawp chhuah tawh thin Chauncey Billups, Mark Jackson, Tim Hardaway, Richard Hamilton, Chris Webber, Ben Wallace leh Marcus Camby te hming pawh a lang leh a ni.

Kum 20 chhung zet a inkhelh tawh hnuah Kobe Bryant hian a vanglai chu Los Angeles Lakers-ah a hmang ngar ngar a. A tirah chuan Shaquille O’Neal nen an inkawp thin a, a hnuah Pau Gasol nen inkawp lehin title vawi 5 an la a, NBA Finals vawi 7 an lut bawk a. NBA khawvelah chuan Bryant hi point score thei ber pawl a ni chho a ni.

Tim Duncan pawhin a vanglai hun chu team pakhat tan chauh a la hmang a, season 19 chhung chu San Antonio Spurs-ah hlir a hmang a. Coach Gregg Popovich kaihhruaina hnuaiah David Robinson, Tony Parker, Manu Ginobili leh Kawhi Leonard te nen an inkawp chho a ni.

Kevin Garnett chuan 2007 nipui lai khan Ray Allen leh Paul Pierce te chu Boston Celtics-ah a zawm a, hemi hma hian kum 12 chhung chu Minnesota Timberwolves-ah hun a lo hmang tawh a ni.

Boston Celtics chuan 2008 ah khan NBA title an la a, 2010 ah khan NBA Finals an lut leh bawk a, hetah hian Kobe Bryant te pawl Los Angeles Lakers chu an hneh ta lo a ni.

Professional team coach zingah Rick Adelman, George Karl, Dick Motta leh Rudy Tomjanovich te hming chu an chhawp chhuak a, college coach zingah chuan Gene Keady, Rollie Massimino, Bob McKillop, Eddie Sutton, Bo Ryan leh Jay Wright te chu an chhawp chhuak bawk a ni.

Copyright © inkhel.com 2024. All rights reserved.