Barcelona defender Gerard Pique chuan tun Pathianni lo awm tura El Clasico match an khelh tur thlirlawkin khawi team ve ve pawh chak thei dinhmuna an dinna a intluk hrih hle tih a sawi.

Catalan club hi La Liga hmahruaitu an ni meka, 2-na Real Madrid lakah point khat chauhin an sang hrih mek bawk. 50% chance chak theihna chance kan nei ve ve a, player tha ve ve tak Ronaldo leh Bale an nei bawka, one-on-one a an that bakah goal khung harsat lo ve ve an ni tiin Pique chuan Madrid forward te chungchang a sawi.

1978 khan Madrid hian a zawnin Clasico ah vawi thum hnehna an lo chang tawha, Clasico hnuhnung pahniha hnehna an chan theih avangin tun Pathianni a hnehna an chan nawn leh theih chuan 1978 hnua a vawikhatna atan Clasico ah a zawnin tum thum an chak leh dawna, hnehna chan leh ngei Madrid hian an tum ruh hle in a rinawm.

Amaherawhchu 1929-30 season atanga vawiinni thlengin Barca hian league leader ni chungin an mualah an la tlawm ngai lo thung. Messi an hmachhuan ber a ni leh ngei dawna, ani hian kumin chhungin La Liga goal 17 ngawt a khung der tawh. Madrid forward trio (Gareth Bale, Karim Benzema leh Cristiano Ronaldo - goal nga theuh) te thun belhkhawm ai pawhin a thun tam tawh zawk a nih chu.

Pique chuan sawi chhunzawmin Sunday a game an khelh tur chu kumin a game pawimawh leh special ber a ni tih sawiin, Madrid chu team ropui tak an nih ve bawk avang leh anni chu title an chuhpui ber an nih bawk avangin Clasico lo awm tur chu a ti special lehzual hle tih a sawi.

An league game hnuhnung 10 a 9 ah te Barca hian hnehna an la chang veka, league game 10 chauh khelh tur a awm tawh bawk avangin he inkhel hi La Liga title decider a nih mai te pawh a rinawm a, inkhel hmuhnawm tak kan hmuh ngei a rinawm bawk.