​City tana rinawm tum Pep leh Sterling

18th February 2020, 04:02AM

Manchester City manager Pep Guardiola leh City player pawimawh Raheem Sterling-te chuan City hremna chu kaltlang pui a nih pawhin club tana rinawm tlat an thlang dawn niin a lang.

Kan hriat tawh theuh angin Europe-a football thuneitu sang ber UEFA chuan Premier League champion lai Manchester City chu an Club Licensing dan leh Financial Fair Play dante an bawhchhiat avangin na takin an hrema, season hnih chhung ngawt City hi European competition-a an tel khap a nih mai bakah euro maktaduai 30 lai chawi tir an ni bawk.

City hian thuneitu sang zawk CAS hnenah an zualko ngei tur thu an sawi ve nghala, hremna hi kaltlangpui a nih dawn leh dawn loh chuan CAS thutluknaah an innghat tawha, hun chauhin a hril dawn.

UEFA-in City hi an hrem mai bakah hremna dang an hmachhawn maithei niin chanchinbu mite chuan an tarlanga, City hi an Premier League title lo lak tawh chu sut sak a ni leh dawn anga sawi a tam bakah point paih saka league hniam zawka paih thlak an ni dawn hial ang te pawhin tarlan a ni nasa hle.

City hian heng hremna te hi an tuar a nih ngat chuan club-in kawng tinrengin a tuar hle dawn a, mahse City manager Pep Guardiola erawh rinawm a tum thung. Guardiola hian kum 2020-21 season thleng City-ah contract a la nei a, City lamin an ban te a nih loh chuan chhuah a tum lo hle a, kum 49 mi hian manager a nih hnuah a contract a la hmang zo lo ngai lo.

Guardiola chuan, “Eng league-ah pawh awm ila, City-ah ka awm zel ang. League Two-ah pawh min dah mahse chhuah ka tum lova, tun hi tanrual hun tak zawk a ni,” a ti.

Guardiola bakah hian English forward Sterling pawh chhuah a tum lo niin chanchinbu mite chuan an tarlanga, City hremna hi kaltlangpui a nih pawhin Sterling hi Etihad Stadium-ah a awm chhunzawm zel a rinawm a ni.

Copyright © inkhel.com 2024. All rights reserved.