Manchester City chu Financial Fair Play dan bawhchhiaa puh an nih avangin Europe khawmualpuia club inelna lianah kum hnih chhung tel phalsak an ni lo a. An hremna hi City in an khing let a, Europe khawmualpuia inelnaa tel hi phalsak an ni leh ta a, an pawisa chawi tur pawh €30 million atanga €10 million a tihhniam a ni.
Premier League season kal mekah a chungnung pali nih tumin club thenkhat chu an la inel chho mek a, Chelsea, Manchester United leh Leicester City te chuan a chungnung pali zinga tel tumin theihtawp an chhuah a. Wolverhampton Wanderers leh Sheffield United te pawhin beiseina an la nei ve mek bawk a ni.
Liverpool chu tun season chhungin champion atan puan an ni tawh a, an hnuai chiahah hian nikum lama champion Manchester City an awm bawk a, anni pahnih hi chu um phak chi an ni tawh lo a. An hnuai hmun hniha awm thei turte chuan beihpui an la thlak chho mek a ni.
Nikum September thla atanga a chungnung pali zinga tel ve tan Leicester City chu tun hnaiah an che fuh lo nual tawh a, mangang deuh ber tura ngaih an ni rih a. League game an khelh hnuhnun 11 ah vawi 2 chiah chak hmel an hmu thei a, an tan chuan a chungnung pali zinga tel turin insan mar viau a ngai ang.
Pathianniah khan Leicester City hian relegate theih dinhmuna ding mek Bournemouth chu 1-4 ngawtin an hneh lo a, Manchester United in Southampton an hneh a nih chuan panganaah an tla thla dawn tihna a ni ang a, United hi pathumnaa chho thei dinhmunah an ding thung dawn a ni.
Manchester United an che tha tluang viau a, tun hnaiah a zawnin vawi li chu an chak tawh a, hei vang hian Southampton pawh hneh theih ngei an inring hle a. An la hmachhawn turte en hian an tan season thara UEFA Champions League khelh theihna kawng a inhawng zau hle a. Southampton nen an inkhelh hnuah hian Crystal Palace leh West Ham United te an hmachhawn leh ang a, an game hnuhnung berah hmun an chuhpui zinga mi Leicester City nen an inkhel ang.
Chelsea chu pathumnaah an awm mek a, palinaa awm Leicester City aiin point 1 in an sang zawk a. Manchester United in Southampton an hneh a nih chuan palinaah an tla thla ve thung ang a. Blues hian an game hnuhnung berah Wolverhampton Wanderers an hmachhawn dawn a ni.
Leicester City nen an inkhelh hnuah hian Chelsea chuan league champion Liverpool an hmachhawn zui ang a, chumi zawhah Wolves nen an inkhel leh dawn a. Liverpool chu champion tawh ni mah se Manchester City record khum an tum avangin chak ngei an tum a rinawm a, Chelsea tan inthlahdah ngam a ni hauh lo ang.
Wolverhampton Wanderers chu paruknaah an awm mek a, an tan season thara UEFA Champions League khelh theih dan tur tha ber chu Europa League a champion a ni tawh dawn a. Nuno Espirito pawlte hian last 16 an thleng tawh a, first leg a 1-1 a lo inhnehtawk tawh Wolves hi thla tharah Olympiakos nen second leg an khel leh dawn a ni.
Season thara UEFA Champions League khel tur leh Europa League khel thei tur hi chiang taka sawi theih a la ni meuh lo a, Liverpool leh Manchester City te chauh chu chiang taka sawi theih an la ni.