Maurizio Sarri chuan Carabao Cup final-ah Manchester City an hneh lo a nih chuan Chelsea club thuneitute’n an ban a rin tawh thu a sawi.

Chelsea leh Manchester City te chu Premier League-ah an inkhel zo deuh chiah a, Etihad Stadium-ah City chuan Chelsea hi 6-0 ngawtin an lo hneh a, hei vang hian Chelsea manager Maurizio Sarri dinhmun chu a tha lo hle a ni.

Italian manager Sarri hi Chelsea tantute mai bakah staff tam takin an thlawp lo tan hle a. Hetianga a boruak a fuh loh chhoh tawh hnuah hian Thawhtanni khan FA Cup-ah Manchester United chuan 2-0 in an hneh zui leh bawk a, Sarri dinhmun a derthawng lehzual a, hei hi amah pawhin a hre chiang hle.

Sarri chuan Wembley Stadium-a Manchester City nen Carabao Cup final an khelh hunah chak ngei ngei a pawimawh zia sawiin, an chak zo lo a nih chuan Stamford Bridge atanga a chhuah a rin tawh thu a sawi a ni.

Europa League-ah Malmo chu an hmachhawn leh dawn a, first leg-ah 2-1 in an chak a, Stamford Bridge-ah second leg an khel leh dawn a, kal zui zel turin an dinhmun a duhawm rih hle a ni.

Manchester United nen FA Cup-a an inkhelh laiin entu mipui chuan Sarri hi nawmnah deuh deuhin an zaikhum nasa hle a, second half an khelh lai phei chuan an zai khum nasa lehzual hle.

Sarri hian Chelsea player e chu a fuih phur zo tawh meuh lo nia sawiin, khelmuala a khelhtir dan chuan player te a tihnual zo tawh niin a sawi a ni.

Chelsea chuan Premier League-ah hmabak an la nei hautak leh viau bawk a, Tottenham Hotspur nen an la inhmachhawn dawn a. Pathumnaa awm Spurs lakah hian an tlawm a nih chuan point 16 zetin an inthlau tawh dawn a ni.

Chelsea board member thenkhat chuan Maurizo Sarri hi bantir a, a hmun ruak luah tur hian Zinedine Zidane sawm an duh a. An duhna tihlawhtling tur hian Chelsea chuan hna hautak zet mai an neih a ngai dawn thung a, season thum chhung a zawna UEFA Champions League title la thei rilru hi an hmin a ngai dawn a ni.