Manchester City chuan AC Milan midfielder Tijjani Reijnders an lak luh thu an puang.

Kar hmasa khan Milan leh City te chu Reijnders chungchangah €55million (£46.3m) velin an inrem tawh a, medical te a neih fel hnuah Reijnders chuan kum 2030 thleng atan Etihad Stadium-ah contract a ziak ta a ni.

Tun nipui bazarah hian Pep Guardiola chuan Rayan Ait Nouri, Marcus Bettinelli leh Rayan Cherki  te bakah Reijnders a la lut fel ta.

Kum 26 mi Reijnders hi season liamta khan Serie A midfielder of the year atan thlan a ni a, competition hrang hrangah Milan tan goal 15 khungin, Milan game 64-ah vawi 63 chu inkhelh bul a tan nghe nghe.

Kevin de Bruyne chuan Napoli a zawm dawn a, a hmun awl hnawhkhat turin Guardiola chuan Reijnders hi a ngaihven ta chat a ni.

Reijnders hi Milan-ah khan defensive midfielder angin a khel thin a, khingpuite ball chhuhsaktu ber leh goalkeeper atanga ball chhuak lo dawngtu ber a ni.

Netherlands tan game 22 a khel ve tawh a, kum 2023 khan a vawi khat nan ram tan a inlan tan a, Euro 2024-ah pawh khan semi-finals lut zingah a tel ve nghe nghe.

Reijnders hi City chuan Club World Cup khelh tir nghal an tum a, City hian June ni 18-ah Wydad AC an hmachhawn ang a, June 22-ah Al Ain an hmachhawn leh ang a, June ni 26-ah Juventus an hmachhawn leh dawn a ni.