Tun nipui bazar-a Manchester City lei tum pathumte chu Juventus midfielder Paul Pogba, Wolfsburg winger Kevin de Bruyne leh Liverpool forward Raheem Sterling te an ni a, Man City hian Pogba an lei dawn a nih chuan £155m lai an sen a ngai dawn niin Daily Star chuan a tarlang.

Pogba club Juventus chuan French midfielder manah hian £80m lai an chhiar a, kum 22 mi Pogba hi kar khat chhunga £250k hlawh turin City hian kum 5 daih contract an pek dawn chuan £65m man hu vel a ni ang. Tin, signing fee atan £10m vel City hian an sen a ngai bawk dawn anga, heng zawng zawng belhkhawm hi £155million lai a ni dawn hem mai le.

Man City chauh hi Pogba duh an la ni lo leh zel. Tun season liamtaa trophy pakhatmah la lo Real Madrid chuan nasa takin team an dinthar leh ngei dawn tih a hriat, a chhan chu an elpui ber Barcelona chuan trophy lian pathum an la tlat mai. Real Madrid hian Juventus midfielder Pogba hi an rim ve mek bawk.

Man City midfielder Yaya Toure chuan City chhuahsan tum tum thin mahse tun nipui bazara City-in sum an hman dan tur an chhawp chhuah hnuah chuan Toure pawh a hlim hle nia sawi a ni a, Man City tana khelh chhunzawm zel pawh a thlang mek nia tarlan a ni.

Man City hian an striker Edin Dzeko chu Roma lamah an kal tir mai a rinawm a, kum 29 mi Dzeko hi Roma chuan £2.2m-a loan-a hawh phawt an tum dawn nia report a ni, Roma hian permanent-a an lei dawn a nih chuan season lehah £13m lai City hnenah an pek a ngai dawn a ni.