Premier League inkhelah Manchester City chuan Etihad Stadium-ah Newcastle United an lo mikhuala, City hian an mikhual hi lo ti duhdah hle in, goal nga ngawt an lo barh.
City tan hian Gabriel Jesus, Riyad Mahrez, David Silva leh Raheem Sterling te chuan goal khat theuh an khung bakah, Newcastle player Federico Fernandez chuan an lamah a tilut palh bawk.
City hian khelh 34-ah point 69 hlawhchhuak tawhin, pahnihnaah an awm chhunzawm zela, pathumnaa awm Chelsea nen point 9-in an inthlau. Newcastle hian khelh 34-ah point 43 hlawhchhuak tawhin, 13-naah an awm ve mek bawk.
Minute sawm vel khelh a nihin City hian hma an hruai nghala, Phil Foden chuan veilamah ball changin, a hmaah Silva a pe a, Silva hian box chhungah ball um lutin, goal hmazawnah ball a cross phei, Jesus chuan goal-ah lo khung zuiin, City goal hmasa ber a khung.
Jesus-a’n goal a khung atanga minute sawm hnu velah, Foden-a’n Silva ball a pek ang deuh chiah hian Kevin de Bruyne chu ball pek a ni a, ani hian goal hmazawnah ball cross pheiin, Mahrez chuan goal-ah a lo chan tira, City goal hmasa pahnih luh dan hi a inang hle.
City hian inkhel an thunun hle a, chance pawh insiam hnemin, an goal khatna leh an goal hnihna inkarah pawh hian chance tha tak tak an nei.
Darkar khat dawn khelh a nihin Jesus chuan Newcastle box chhungah ball a khalha, Jesus-a ball khalh lai hi Matt Ritchie chuan rawn khawihin, Fernandez a pera, goal-ah a lut zuia, 3-0 in City in hma an hruai.
Drinks break an neih hma lawkin, Fabian Schar chu Sterling lakah, an box pawn deuh chiaha a foul-a, City-in freekick an hlawhchhuak; captain Silva chuan freekick atang hian mawi takin goal a khunga, City goal lina a khung.
City hian an la duhtawk lova, 4-0 in inkhel a tawp mai dawn anga a lan hnuah City hian goal an khung belh; Newcastle hian an half-ah ball an hloha, Silva chuan Newcastle goal lamah ball khalh pheiin, a thlanga awm Sterling a pe a, Sterling hian awlsam takin goal a khunga, 5-0 in inkhel a tawp.
Manchester City 5-0 Newcastle United
(Jesus 10’, Mahrez 21’, Fernandez 58’OG, Silva 65’, Sterling 90+1’)
Player Ratings
Manchester City: Ederson 6; Cancelo 7, Otamendi 6, Stones 6, Zinchenko 7; Rodri 6, De Bruyne 7, David Silva 8; Mahrez 7, Jesus 7, Foden SUBS: Walker 6, Sterling 7, Gundogan 6, Bernardo 6, Doyle 6
Newcastle United: Dubravka 7; Yedlin 5, Krafth 6, Schar 5, Fernandez 6, Rose 6; Lazaro 7, Shelvey 6, Bentaleb 5, Ritchie 6; Joelinton 5 SUBS: Gayle 6, Muto 6, Manquillo 6, Atsu 6, M Longstaff 6