Manchester City chuan an defender Aymeric Laporte chu contract thar an ziahpuia, Etihad Stadium-a cham turin kum 2025 thleng a tan an thlung nghet.

City hian nikum January thla khan French defender Laporte hi Spanish club Athletic Bilbao atangin an laluta, a manah pound maktaduai 57 lai an seng.

Tun season-ah City manager Pep Guardiola chuan Laporte hi a chhawr rim hle a, Benjamin Mendy a inhliam avangin Pep hian kum 24 mi hi left back-ah pawh a hmanga fova, centre back lamah pawh Vincent Kompany leh Nicolas Otamendi-ten an nek chhuak zo tawh meuh lo.

Laporte chuan contract thar a ziah chungchang sawiin, “Hun rei zawk atan City-a ka inthlung nghet hi ka lawm hle a, he hmuna ka lo kal tirh atang khan Pep leh player-ten min lo lawm em em a ni. Club hian hma ka sawn theih nan engkim ka hmaah an chhawp a, hma ka sawn tawh hle a, hma la sawn zel pawh ka duh.

“Trophy chawi ka duh ngei a, ka thil tumte ka tih hlawhtlin theihna tur chu City hi a ni,” a ti.

Tun season kal mekah Laporte hian City Premier League game leh Champions League game zawng zawngte a la khel veka, mahse France erawhin vawikhat mah an la ko lova, an koh har a rinawm tawh lem lo.

City Director of Football Txiki Begiristain chuan Laporte an thlun ngheh chungchang sawi ve in, “Aymeric hi theihna sang tak nei a ni a, a hun tha zawng zawng kan tana a hlan tur hi kan lawm hle a ni. Kan lei hma atang tawh khan amahah hian theihna sang tak a awm tih kan hmu tawh a, tun thla 12 chhunga hma a sawn zia hi a mak zawk a ni,” a ti ve bawk.