10 Jan 2019 08:42

inkhel

City-in goal si kaw faiin an mikhual an sawp

Carabao Cup semi final first leg inkhelah Premier League champion lai Manchester City chuan Etihad Stadium-ah Burton an lo mikhuala, City hian an mikhual Burton hi dimna pakhatmah an nei lova, goal kua an lo barh.

City tan Gabriel Jesus chuan goal li lai a khunga, Kevin De Bruyne, Oleksandr Zinchenko, Phil Foden, Kyle Walker leh Riyad Mahrez-te chuan goal khat theuh an khung bawk.

Manchester City 9-0 Burton

(De Bruyne 5’, Jesus 30’, 34’, 57’, 65’, Zinchenko 37’, Foden 62’, Walker 70’, Mahrez 83’)

PLAYER RATINGS

Man City: Muric 6, Walker 7, Otamendi 6, Garcia 6, Zinchenko 7, Gundogan 8, D Silva 9, Sane 9, De Bruyne 8, Mahrez 9, Jesus 9. Subs: Foden 7, B Silva 6, Danilo 6

Burton: Collins 4, Brayford 4, Buxton 4, Allen 4, Turner 4, Fraser 5, Akins 6, Harness 4, Hutchinson 4, Wallace 4, Boyce 4. Subs: Fox 5, Templeton 5, Sbarra 6

Match Report

City lamin 4-3-3 formation an hmanga, Jesus chu no.9 role-ah khelin, a sirah Mahrez leh Sane-ten an thlawpa, tun season-a la inkhel tlem tak De Bruyne pawh khelin, player naupang pahnih Garcia leh Zinchenko –te chu defence lamah an khel ve bawk. City manager Pep Guardiola chuan Brazilian goalkeeper Ederson awl tirin goalkeeper palian kum 20 mi Arijanet Muric chuan City tan si ban a nghak. Burton lamin 4-5-1 formation an hmanga, Boyce chu hmatawngah matlat tir a ni. Burton hian City an hneh lo hle a, sawi ngai pawh a ni hran lo, an thah mawlh mawlh a ni ber mai.

Inkhel tan a ni a, City in inkhel an thunun hneh nghala, goal thun nan hun pawh an mamawh tam lo. Inkhel tan atanga minute nga hnuah tun season-a inhliam avanga khel tlem tak De Bruyne chuan goal a khung nghala. Ilkay Gundogan chuan box chhungah De Bruyne tan hian ball a vawrh luta, Belgian playmaker hian goal-ah a lo tauh luta, a lu in a vawikhat City tan goal a khung. Minute sawm chuang hret khelh a nihin Burton lam hian goal khungna hun tha tak an nei ve a, box chhung veilam atanga cross ball lokal chu, box chhung dinglama awm; changtu neitu Harness chuan lo chhuih mahse, goal a pet khum. Darkar chanve khelh a nihin City-in goal an khung leha, Gundogan bawk chuan box chhungah Sane-a tan tha takin ball a vawrh luta, Sane hian petin, Burton goalkeeper-in a lo save pera, hemi hi Jesus chuan a lo tauh goal zui. Minute li hnuah Jesus hian goal a khung leh nghala, Gundogan-a’n box chhunga ball a vawrh luh chu David Silva chuan Jesus-a tan lo tawk zeuhin, Jesus hian hnai tak atangin a goal hnihna a khung. Minute thum hnuah City-in goal an khung belha, box pawn chiah veilam atangin Zinchenko chuan mawi takin a ke veilamin a chhuih goal, first half hi 4-0 in a tawp.

Second-half tan a ni a, second half tan atanga minute sawm chuang hret khelh a nihin City-in an goal ngana an khunga, David Silva chuan box chhunga tlan lut, Mahrez chu tha takin ball a pass a, Mahrez hian box chhung dinglam atangin goal zawn lamah a kangin ball a pe ve leha, Jesus chuan lo tauh goal zuiin hattrick a siam. Darkar khat chuang hret khelh a nihin City –in goal an khung leha, goal khungtu hi English rawlthar Foden a ni. Box chhunga in pawt lut Jesus chuan ball tha tak a hmu a, Jesus hian pet goal tum mahse Burton keeper Collins chuan a lo save pera, hemi rawn per hi Foden chuan a lo pet goal ve leh. Minute thum hnuah City-in an goal sarihna an khunga, goal khungtu hi Jesus bawk a ni a, a goal lina a khung. Box chhung veilama awm Sane chu tha takin ball pek a ni a, ani hian goal hmazawnah lei hrulah ball pe pheiin Jesus chuan hnai set sawt atangin goal-ah a rawn tlawh lut. Minute nga hnuah City-tan Walker chuan goal a khung ve leha, box chhung veilam atang ball lokal chu Walker chuan chiang takin Burton goal-ah a lo khung. City-in 83mins-ah an goal kuana an khunga, goal khungtu hi City player manto ber Mahrez a ni. Mahrez-a goal hi Walker- goal thun dan nen a inang hle a, box chhung veilam atangin Bernardo Silva chuan goal hmazawn lamah ball cross pheiin Mahrez hian a lo khung zuia, City hi 9-0 in an chak ta a ni.