Premier League inkhelah champion lai Manchester City chuan Etihad Stadium-ah Leeds United an lo mikhual a, 7-0 laiin City hian an mikhual hi lo sawpin, point thum an hlawhchhuak.

City tan hian Phil Foden, Jack Grealish, Riyad Mahrez, John Stones leh Nathan Ake-te chuan goal khat theuh an khunga, Belgian playmaker Kevin de Bruyne chuan goal hnih a khung bawk.

Khelh 17-ah City hian point 41 hlawhchhuak tawhin, league hmahruaitu an ni chhunzawm zel a, Leeds hian khelh 17-ah point 16 bak la nei lovin, 16-naah an awm mek ve thung a ni.

City hian minute sawm an khelh tlin hmain an goal hmasa ber an khunga, goal hmasa ber khungtu hi Foden a ni a, hei hi Pep Guardiola enkawlna hnuaiah City-in Premier League goal 500 an thunna a ni.

Minute sawm chuang hret an khelh hnuah City hian an goal hnihna an khung chhunzawm nghal a, right-wing lam atanga Mahrez-a cross tha tak chu City player man to ber Grealish chuan goal-ah a lo tauh lut a, si hnih faiin City hian hma an hruai.

Darkar chanve an khel chho a, Rodri-a through ball pek chu De Bruyne chuan goal-ah chantirin, si thum thum faiin City hma a hruaipuia, first half-ah hian goal a luh belh tawh lo.

Second half tir teah goal a lut nghal a, Mahrez chuan hun thawl angreng tak neiin yard 18 vela hla atangin goal-ah ball a shoot a, Firpo a per hnuah goal-ah lut zuiiin, 4-0 a ni.

Darkar khat chuang hret an khelhin, De Bruyne chuan yard 20 vela hla atangin mawi zetin goal-ah ball a pet lut a, a goal hnihna khungin si nga faiin City hma a hruaipui.

Leeds goalkeeper Meslier-a’n tha tak tak save vawi hnih a neih hnuah Stones chuan 74mins-ah goal a khung a, minute li hnuah corner atanga ball vawrh luh chu Ake chuan goal-ah a lo tauh lut leh a, si sarih faiin City hian an mikhual Leeds hi an hneh ta a ni.

Manchester City 7-0 Leeds United

(Foden 8’, Grealish 13’, De Bruyne, 62’, 32’, Mahrez 49’, Stones 74’, Ake 78’)

Player Ratings