UEFA chuan Premier League champion lai Manchester City chu UEFA Financial Fair Play (FFP) dan an bawhchhia nge an bawhchhe lo tih an chhui leh dawn.

City hian FFP dan hi an bawhchhe ngei a nih chuan European competion-ah an tel thei dawn lo. Website pakhat Football Leaks chuan City hian an sponsorship chu a nihna ai tama an sawi angin thla hmasa khan a lo ziak tawh a, hetianga an tih chhan hi FFP dan an bawhchhiat loh nan niin a lang.

City hian kum 2014 kha FFP dan an bawhchhiat avangin thiamloh an lo chang tawh a, hemi tum hian UEFA nen inremna neiin, pound maktaduai 49 an chawi. Kar thum liamta khan City hian FFP dan an bawhchhia nge bawhchhe lo tih chu en dik a nih tur thu UEFA lam hian an lo puang tawh.

UEFA president Aleksander Ceferin chuan, “Thil awmdan kan endik mek a, he thil chhui chiang tur hian ruat bik pawh kan nei. Hun reilo teah thil awmdan zawng zawngin fiah taka hriat theih a ni dawn a ni,” a ti.

Kum 2016 khan Turkish club Galatasaray chu FFP dan an chawhchhiat avangin European competition a an inhnamhnawih phal loh an lo ni tawh bawk nghe nghe.