Inrinni zan Premier League inkhelah Manchester City chuan 5-1 in Etihad Stadium-ah Watford an sawp a, City hian champion lam an pan zel.

City tan hian Brazilian striker Gabriel Jesus chuan goal li ngawt a thun bakah Rodri chuan City tan hian goal a khung bawk a, Watford goal neihchhun hi Hassane Kamara thun a ni.

Khelh 33 atangin City hian point 80 an hlawhchhuak tawh a, league hmahruaitu ni chhunzawm zel a, Liverpool nen point 4-in an inthlau a, City hi khelh khatin an khel tam zawk. Watford hian khelh 33 atangin point 22 bak an la nei lova, 19-naah awm mekin an dinhmun a tha lo hle a ni.

Inkhelh tan atanga minute 4-naah ah City hian hma an hruai a, Jesus chuan box chhung veilam atanga Zinchenko-a ball cross chu goal-ah a lo thun a, City hma a hruaipui. Minute sawmhnih chuang hret an khelhin mual dinglam atanga Kevin de Bruyne cross tha tak chu Jesus hian goal-ah a lo tauh lut a, si hnih faiin City hian hma an hruai.

Minute nga hnuah Watford hian City an chhanglet a, box chhung velamah Kamara ball pek a ni a, Kamara hian goal khung zuiin, 2-1 a ni. First half-ah a vawi thum nan City hian hma an hruai a, Reheem Sterling-a ball pek chu Rodri chuan box pawn atangin mawi takin goal-ah a thlawh lut a, 3-1 in first half a tawp.

Second half an tan chauh tihin Watford goalkeeper Ben Foster chuan box chhungah Jesus a titlu a, City-in penalty an hlawhchhuak. Jesus hian a penalty hlawhchhuah hi goal-ah chantirin hat-trick a siam a, 4-1 in City hma a hruaipui. Jesus bawk hian minute nga hnuah goal dang a thun leh a, City hian nuamsa takin an mikhual an hneh a, point thum hlu tak an hlawhchhuak.

City hian khelh nga khelh tur an la nei a, Liverpool nen an la inum zel a, team hnih te hi an khelh that tluan em avangin an tlawlhtluk a rinawm tawh lova, season tawp thlengin an inum dawn niin a lang. City hi champion lai an ni a, an title humhim tumin Watford lakah hian hnehna pawimawh tak an chang a ni.