Manchester City hi an defence lamah an squad a pan angrenga, a bikin centre-back ah indaih loh chang neiin midfielder Fernandinho chu defence-ah a khel zeuh zeuh a ngai fo.

City hian centre-back pahnih Nicolas Otamendi leh John Stones-te chiah chhawr theih an nei meka, an defender pawimawh ber Aymeric Laporte chu a inhliama, nakkumah bak French defender hi a lo kir thei dawn lo.

City hian season hmasa an pha lo hle a, an game hnuhnung berah pawh an um ber Liverpool chu 3-1 laia hneh lovin tunah hian palinaah an awm mek.

City hian an defence neih pan an tuar mek niin mi thenkhat chuan an lo sawi fo tawha, Laporte bakah hian defender dang inhliam pawh an nei.

Tun nipuia City chhuahsan tu Kompany chuan, “City hian defender thar an lei a ngaiin ka hre lova, Anfield-ah hi chuan khelh kan harsat ve thin hrim hrim sa a ni. Super Sunday-ah khan kum 25 chhung kan lo chak tawh lohna Anfield-ah City kan lengluta, hnehna chan mai mai hi a awlsam lo.

“Game khatah game hnih khel ang kan ni a, a hmasa zawk chu team tha tak kan tuma, a dawt leh chu history ropui tak kan chai tel tih hi a ni. City tana defend dan tha ber chu lehlam nawr hi a ni reng thin a, chu chu thlak danglam ngaiin ka hre lo. City player te hi an khel tha chho zel anga, hnehna an rawn chang chho leh chur chur dawn tih hi ka ring nghet tlat a ni,” a ti,