Manchester City chuan an assistant manager Mikel Arteta chu a chhuak duh a nih chuan a kalkawng dal an tum lo tih English chanchinbu te chuan an tarlang.

Arteta hi kum eng emaw zat Pep Guardiola thlazar hnuaiah assistant manager hna a lo thawk tawha, tunah hian a club hlui Arsenal nen sawizawm an ni mek.

Arsenal hi an manager Unai Emery hnuaiah an che tha tawk lo hle a, Emery-a dinhmun hi a derthawng tawh hle niin chanchinbu mite chuan an ziak nasa hle bawk.

Arsenal hotute chuan an manager hi an thlawp thu sawi tawh mahse Arsenal hian hma an sawn thuai loh chuan Emery hi ban a ni lovang tih a sawi theih hauh lova, Emery hi ban a nih chuan Arsenal hian City assistant manager Arteta lam hi an hawi dawn niin sawi a ni bawk.

Arsenal hian nikuma Emery an lakluh hma pawh khan an captain hlui Arteta hi an ruai mai dawn angin sawi a lo awm tawha, Arteta hi Arsenal manager a la ni nge nge dawn niin mi tam tak chuan an ngai bawk.

Arsenal hian Arteta hi an dawra, Arteta pawh hian North London lam pan a duh a nih chuan City hian Spanish midfielder hlui hi chelh zui an tum lo niin tarlan a ni a, tlang takin Arsenal leh Arteta-te hi an inbe thei dawn niin a lang a ni.