15 Mar 2019 11:36

inkhel

​City-in an sawp hnuah Schalke in an manager an ban

Champions League Round of 16 second leg inkhela Manchester City laka 7-0 laia an tlawm hnuin German club Schalke chuan an manager Domenico Tedesco an ban.

Schalke hian tun inrinni lo awm tur hian Bundesliga inkhelah RB Leipzig an hmachhawn dawn a, he inkhelah hian Huub Stevens leh Mike Buskens-te chuan Schalke hi an enkawl ang. Stevens hi Schalke manager hlui a ni a, Buskens hi an midfielder hlui a ni bawk.

Schalke hi an game hnung pangaah tlawm vekin, tunah hian Bundesliga table-ah 14-naah awmin, khelh 25-ah point 23 an hlawhchhuak tawh. Champions League round of 16 first leg-ah 3-2 in City hi an hneh lo tawh a, second leg-ah beiseina nen City hmachhawn leh mahse an tlawm chiang hle a, Tedesco chuan a hna a chan zui phah bawk.

Tedesco hi kum 33 mi chauh a la ni a, kum 2017 July thla atang khan Schalke enkawl tanin, game 75 a khelhpui hman. Kum 2016 leh 2017 inkar khan Schalke Under 19 a lo enkawl tawh bawk.

Tedesco hi German-Italian a ni a, Schalke bak hi club enkawl mumal la nei lovin, kum 2017 khan German second division club FC Erzgebirge Aue a enkawl zuai tih loh chu Schalke bak a la enkawl lo a ni.