Norway leh Manchester City striker Erling Haaland chu a inhliam a, Sunday-a Norway in Euro 2024 qualifier an khelh hunah pawh Haaland hi a inkhel thei dawn lo.

Norway hian tun Sunday zanlai hian Euro 2024 qualifier-a an game hnuhnung ber an khel dawn a, Scotland an tlawh dawn a, Norway chuan an striker Haaland chu Scotland laka an chhawr theih dawn loh thu an puang tawh.

Ningani liamta khan Norway hian friendly match inkhelah Faroe Islands chu si hnih faiin an hneh a, he inkhelah hian Haaland hi inhliamin, foot injury a ni. Haaland-a hliam hi a serious lo tih Norwegian Football Federation chuan an tarlang tel a, international break zawhah Manchester City in an chhawr leh theih nghal mai a rinawm.

Norway hi Euro 2024 qualifier-ah Group A-ah an awm a, Group A atang hian Spain leh Scotland te chu nakkum Euro khel turin an inpet tling tawh a, Norway hi pathumnaah awm mekin, point 10 an nei a, Scotland lakah hian an chak a nih chuan play-off khelhna chance an la nei.

Norway in he inkhel pawimawh takah an striker pawimawh tak Haaland an chhawr thei lo tur hi a pawi thui maithei a, Haaland hian Norway tan game 29 khel tawhin, goal 27 a khung tawh a ni.