Tun season-ah Premier League champion lai Manchester City an vanduai a, an player pawimawh tak tak inhliamin a tlakbuak nual. Mahse City player inhliamte an dam kim tan mek a, squad kima inkhelh leh hun Bernardo Silva chuan a nghahhlel hle.

City player pawimawh pahnih Kevin De Bruyne leh Benjamin Mendy-te chuan tun season-a hun tam zawk an khel thei lova, anni bakah hian David Silva, Fernandinho, Sergio Aguero leh Ilkay Gundogan-te pawh inhliam avanga khelh theih loh chang an nei zeuh zeuh.

Tunah erawh City player tam zawk an dam tawha, De Bruyne pawh inkhel leh tawhin, French full-back Mendy chiah la inkhel thei lo a awm tawha, Mendy pawh hi tun thla tawp lama inlan thei tura beisei a ni mek.

City hian tunkar tira Wolves an hneh tum khan bench-ah De Bruyne, Aguero leh Riyad Mahrez-te an awm a, City squad chhah zia a lang. City player Bernardo Silva pawh a phur a, player tinte an mamawh zia a sawi. Silva chuan, “Tunah chuan kan dam kim tan titih tawha, a lawmawm hle a, a chhan chu player tinte hi kan mamawh a ni.

“Kan vaiin kan kim leh tan hi kan tan a tha hle. Tun season-ah player inhliam kan ngah hle a, squad kima inkhelh kan la nei lo. Squad kan kim thawkhat hi a lawmawm em em a, inelna zawng zawngah theihtawp kan chhuah zel dawn a ni,” a ti.

Kum 24 mi Silva hi winger ni mahse City manager Pep Guardiola chuan indaihlohna avangin midfield-ah a hmang thin a, a khel chhe lo hle. De Bruyne a lo dam chho nen Silva dinhmun hi a derthawng thei a, mahse chu chu Silva chuan pawi ti lovin, club lian-a awm chuan thil nih dan tur ve reng a nih thu a sawi.

Silva chuan, “Kan dam kim chuan ka dinhmun a derthawng thei a, mahse chu chu khawvela club tha ber zinga pakhat tana khelh chuan thil nih dan tur reng a ni. Ka position-ah player tha tak tak kan nei a, theih anga tam khel tur chuan rim taka thawh a ngai. Chu chu kan tan thil tha a ni a, a chhan chu squad kan nei tha tih a ti lang. Tupawh kan inel tawn vekin kan innawr tawn veka, chu chu team ang pawhin min thawhrim  zual tir hle a ni,” a ti.