Manchester City chuan an manager Pep Guardiola chu kum hnih daih contract thar an ziahpui thu an puang a, Guardiola contract thar hian kum 2025 June thla thleng a daih.

Spanish manager hi City-ah hian kum ruk a awm tawh a, hemi chhung hian trophy 11 chawi tawhin, a trophy chawi tawh zingah Premier League title pali lai a tel.

Contract thar a ziah hma hian Guardiola hian tun season daih bak Etihad Stadium ah hian contract a nei tawh lova, hun eng emaw chen City nena an indawr hnuah inremna thuthlung an ziak thei ta a ni.

Kum 51 mi Guardiola chuan, “A tir phat atang khan he hmun hian danglam bikna riau a nei tih ka hre nghal a, a aia hmun tha zawk a awm bik lova, Manchester City-a kum hnih dang ka awm leh tur hi ka lawm hle a ni. He club-a min ring tu zawng zawng te chungah hian lawmthu ka sawi seng lova, nuam ka ti a, ka hlim a, ka hna a tha thei ang bera ka thawh theihna turin ka mamawh engkim ka nei.

“He club hian hmalam hun eng tak an nei a, kum 10 liamta chhung khan kan hmu tawh a, a bak kum 10 dang pawh hi a danglam dawn lova, a chhan chu he club hi an insawhnghet hle. Kan la hlawhtlin ho zel theih pawh ka beisei a, chuvanga cham zel duh pawh ka ni a, trophy lak tumin kan bei zel ang,” tiin contract thar a ziah chungchang a sawi.

Guardiola hi tunlai manager tha ber zinga mi a ni a, kum 2008 khan Barcelona first team enkawl tanin, Barcelona manager lo ni tawha hlawhtling ber a ni a, Catalan club hi kum li a enkawl chhungin trophy 14 ngawt a chawipui a, chung zingah chuan La Liga title pathum leh Champions League nomawi a tel. Barcelona a chhuahsan hnuah Bayern Munich panin, Bayern hi a zawnin Bundesliga title pathum a lak pui leh a, kum 2016 atang khan City hi a enkawl tan.

Season hmasa khan Pep Guardiola hnuaiah City hian Premier League title an la a, season kal mekah pahnihna dinhmun luah mekin, khelh 14 atangin point 32 an hlawhchhuak tawh a ni.