Manchester City rawlthar duhawm tak Phil Foden chuan Manchester City-a cham zel turin kum nga leh a chanve daih contract thar a ziaka, Citizens tan kum 2024 thleng tal chu khel tura ngaih a ni.

City chhulchhuak kum 18 mi hi English rawlthar zingah chuan beiseiawm ber zinga mi a ni a, la naupang hle mahse City manager Pep Guardiola chuan first team tan a chhawr fo tawh. English rawlthar dang Jadon Sancho hnung zuia ram pawn lama kal ve mai tur anga sawi ni nasa hle mahse Foden hi amah chherchhuaktu tan rinawm a thlanga, City-ah hian kum riat a nih atangin a awm tawh.

Season hmasa mai khan kum 17 mi niin City first team tan Foden hi a inlan tan a, inelna hrang hrangah vawi 22 lai a inlan tawh. Foden chuan contract thar a ziah chungchangah, “Contract thar ka ziak hi ka lawm zia ka sawichhuak thiam lo. He hmunah hian ka awmna a rei tawh em em a, ka puitling chho zela, mi thar tamtak pawh ka tawng chho mek. Contract thar ka ziak thei hi chu ka duhthusam thlen dikna a ni,” a ti.

City director of football Txiki Begiristain chuan, “Kum nga leh a chanve lo awm tur chhunga Phil kan thlung nghet thei hi kan lawm hle. Player thiamna sang tak nei a ni a, City chhulchhuak a nih avangin kan hnena khelh zel hi a duh. Pep hnuaiah a awm a, player tha tak tak zingah a chetla bawka, a tan chuan helai hmun aia tha hi a awm chuang lo a ni,” a ti ve bawk.

Foden hi kum 2017-a India rama FIFA U-17 World Cup khelhah England tan a che tha hle a, England champion theihna kawngah thawhhlawk hle in, Golden Ball lawmman hial a dawng a, kum 2017 vek khan BBC Young Sports Personality of the Year lawmman hlan a ni bawk a ni.