17 Apr 2016 09:56

Inkhel

Mizo Sports Website hmasa ber

​Chinese GP-ah Rosberg pakhatna

Shanghai-a Chinese GP hmuhnawm takah Mercedes driver Nico Rosberg chu pakhatna a ni a. Tun season intlansiak pathum neih tawhah Rosberg hi pakhatna a la ni vek a.

Season hmasa nena chhiar zawmin a zawnin intlansiak hnuhnung 6-ah Nico Rosberg hi pakhatna a la ni vek a, a zawna intlansiak vawi 6-a pakhatna ni thei driver 4 na a ni ta a ni.

Ferrari driver Sebastian Vettel chu pahnihna niin Red Bull driver Daniil Kvyat chu a career-a podium a chan vawi hnihna niin, pathumna a ni a. Engine chiangkuan loh avanga practice tlan theilo leh qualifying-a harsatna tawk World Champion Lewis Hamilton chuan a hnung ber atangin bul tan mahse 7-na a rawn ni leh phak a ni.

Super soft tyre a hman avanga bul tan tha Daniel Ricciardo chuan pole atanga bul tan Nico Rosberg chu intlansiak tan tirah a lehpel nghal a. Mahse rei an tlan hmain Ricciardo ke hnunglam veilam chu a chhiat tak avangin Pit-a lut a ngai ta, hei vang hian Ricciardo hian a hma lam a um hleithei ta lo a ni.

Intlansiak tan tir turn 1-ah Redbull car vangin Ferrari car pahnih an intai a. Sebastian Vettel chuan a team-mate Kimi Raikkonen chu tauh palhin, dinhmun tha taka ding thei tur Kimi Raikkonen chu a tawlh chhuak a, a hnung lamah intlansiak a zawmin Lap khat naah pit-a luh ngai khawpin a chhia a. Hei vang hian podium a chang ve thei ta lo a ni.

Vettel pawh a hnun phah hman hle a, intlansiak lai leh a zawhah Vettel hian Kimi hnenah ngaihdam a dil nghe nghe a ni. Vettel leh Hamilton tlan an hmuhnawm fal hle a. Super soft tyre hmangin Vettel chuan a dinhmun a siam tha chhova, Kimi nen an intai avangin car 5 in an pel hman a, theih tawpa a um chho leh chu hmuhnawm tak a ni.

Hamilton pawh palina emaw pangana emaw tal ni chho thei dinhmunah a rawn ding. Intlansiak tawp lamah Kimi, Massa leh Ricciardo te nen an inum chho a, mahse world champion lai hian a theihna zawng zawng pawhin a um phak thei ta lo a ni. Daniel Ricciardo chu palina a ni a, Kimi Raikkonen chu pangana niin Massa chu parukna a ni a, Hamilton chu pasarihna a ni ta a ni.

Shanghai-ah hian Nico Rosberg a tlan tha hle a, +37.8 sec laiin a fal. Championship-ah a team-mate leh champion thei tura beisei Lewis Hamilton chu point 36 laiin a tlansan ta a ni.

Intlansiak zawhah Vettel chuan Daniil Kvyat hmachhawnin, "Engatinge khatiang khan i rawn inkhawh phei reng reng, ka line-ah khan tlan zel ilang chuan kan insu ngei dawn a. Chuvang chuan ka vei lamah a tawlh phah a, ka team-mate Kimi nen kan intai phah ta a nih kha," tiin a sawi a.

Russian driver Kvyat chuan, "Intlansiak a nia, khatia ka rawn lan chuan tlan muan mai tur a ni," tiin a chhang a. Vettel chuan, "Car pahnih kan awm tih i hmu lovem ni?" tiin a zawt leh a, Kyvat chuan, "Ka vei lamah car pahnih engtin nge ka hmuh theih ang." tiin a chhang ve leh a.

Vettel chuan, "I rawn tlan dan kha a atthlak lutuk. I vannei khawp mai, i chesual lova," tiin a sawi leh a. Kyvat chuan, "Podium-ah i ding tho alawm.. engpawh nise Kimi hnenah ngaihdam ka dil a ngai a ni, hmun awl kha a tlem em a ni. Pahnihna i nih avangin ka lawmpui lutuk che, " tiin a chhang a, driver pahnihte hi tha takin an inkawm chhunzawm leh thei a ni.

Chinese GP result

1. Nico Rosberg, Mercedes, 56 laps

2. Sebastian Vettel, Ferrari, +37.8s

3. Daniil Kvyat, Red Bull, +45.9s

4. Daniel Ricciardo, Red Bull, +52.7s

5. Kimi Raikkonen, Ferrari, +65.9s

6. Felipe Massa, Williams, +75.5s

7. Lewis Hamilton, Mercedes, +78.2s

8. Max Verstappen, Toro Rosso, +79.3s

9. Carlos Sainz, Toro Rosso, +84.1s

10. Valtteri Bottas, Williams, +86.2s

11. Sergio Perez, Force India, +94.3s

12. Fernando Alonso, McLaren, +97.2s

13. Jenson Button, McLaren, +102s

14. Esteban Gutierrez, Haas, +1 lap

15. Nico Hulkenberg, Force India, +1 lap

16. Marcus Ericsson, Sauber, +1 lap

17. Kevin Magnussen, Renault, +1 lap

18. Pascal Wehrlein, Manor, + 1 lap

19. Romain Grosjean, Haas, +1 lap

20. Felipe Nasr, Sauber, +1 lap

21. Rio Haryanto, Manor, + 1 lap

22. Jolyon Palmer, Renault, +1 lap

Pictures Credit : EPA