China ramah Mousa Dembele a kal dawn

18th January 2019, 01:01AM

Mousa Dembele chuan Tottenham Hotspur chhuahsanin China ram a pan dawn a, Chinese Super League club Guangzhou R&F chu kum thum chhung atan a zawm ang.

Belgium midfielder Mousa Dembele hian August 2012 khan Fulham chhuahsanin Tottenham Hotspur a zawm a, Spurs a zawm ni atanga ni thum naah Norwich City nen an inkhel a, goal a thun zui nghal nghe nghe a. Spurs tan hian game 250 zet a khel hman a, mahse inhliam avangin tun season chhungin Premier League game 10 chauh a khel thei a ni.

Spurs chuan an website-ah, “Chinese Super League club Guangzhou R&F nen Mousa Dembele chungchangah kan inrem a, engkim tih fel a nih hunah Dembele hian Guangzhou hi a zawm ang,” tiin an tarlang a ni.

“Mousa Dembele hi kan player pawimawh berte zinga mi niin, starting XI ah hmun a chang nghet chho hle a, game 250 zet mai a khel hman a, hengah hian goal 10 chu a thun a. Mousa hun hman zel turah duhsakna kan hlan a ni,” an ti bawk.

Tun season tawp ruala Spurs-a a contract tawp tur Dembele hian Belgium tan game 82 a khel tawh a, Russia rama 2018 FIFA World Cup khelha pathumna ni thei Red Devils team ah pawh khan a tel nghe nghe a ni.

Tottenham leh Guangzhou te inremna zat hi engmah sawi lan a awm rih lo a, mahse British media te chuan Chinese club hian Tottenham hi kum 31-a upa Dembele manah hian pound 11 million an pe niin an tarlang.

Nikum November thlaa Premier League-a Tottenham leh Wolverhampton Wanderers an inkhelh khan Dembele hi a lut a, mahse inhliam vangin minute 7 chauh a khel hman a, an thlak zui a. Kha bak kha chu Spurs tan hian a inlan zui leh tawh rih lo a ni.

Copyright © inkhel.com 2024. All rights reserved.