China lamah Ba a insawn.

28th June 2015, 07:06AM

Senegalese striker Demba Ba chuan Besiktas chhuahsanin Chinese club Shanghai Shenhua a zawm.

West Ham, Newcastle leh Chelsea striker hlui manah Shanghai Shenhua hian £9m an seng a, Paris Saint-Germain midfielder hlui Mohamed Sissoko pawh ni rei vaklo liamta khan an lo lalut tawh bawk a ni.

Kum 30 mi Ba hi West Brom nen pawh sawizawm hman an ni a, season khat chauh Turkish club Besiktas-ah hian a khel hman a kum 2018 thleng daih contract a nei.

Season khat lek Besiktas tan hian khel mahse a che tha hle a, game 44 khelin goal 27 a khung a thiante pet goal tura siamsak pawh vawi 7 lai a nei hman.

Shanghai Shenhua-ah hian Chelsea striker hlui Didier Drogba pawh kum 2012 leh 2013 inkar khan alo khel tawh a, Manchester United midfielder hlui Nicky Butt pawhin kum 2010 khan South China tan alo khel ve tawh bawk a ni.

Shenhua striker thar tur Ba hian French club Rouen atangin bul a tan chhova, hemi hnu hian Belgian club Mouscron tan a khel leh a kum 2007 August thla khan German club Hoffenheim chuan €3m sengin an lei.

Kum 2011 January thlaah West Ham United-in kum thum daih contract ziahpuiin England lamah an lalut a, hemi kum June thlaah Newcastle United-in an lei veleh a kum thum daih turin contract an ziahpui.

Magpies tan hian league-ah game 54 khelin goal 29 a khung a, a chetthat vang hian kum 2013 Janaury thla khan Chelsea-in kum thum leh a chanve daih contract ziahpuiin an lei a, aman hi puanzar a nilo.

London club-ah hian season khat chauh awmin league-ah game 33 a khel a goal 7 a khung. The Blues atang hian Besiktas-in €6m sengin kum 2014 July thla khan an lei chhawng leh a, Turkey-ah hian a che tha thawkhat viau mahse season khat bak a awm dawn ta lo va China a pan.

Ba hian Senegal national team tan game 19 khelin goal li a khung tawh bawk a ni.

Copyright © inkhel.com 2024. All rights reserved.