Chi inthliarnaa inhnamhnawih match 6 an hrem dawn

01st August 2019, 11:08PM

English Football Association (FA) chuan 2019-20 season atangin chi inthliarna kawnga fihlim lote chu na takin an hrem tawh dawn a. A vawi khatnaah pawh match 6 chhung an hrem tawh ang.

Britain-ah chuan chi inthliarna hi an do nasa chho viau a, hetiang lampang dona kawnga hma latu lian ber ‘Kick It Out’ chuan season liam taah khan chi inthliarna leh vun rawng vanga inhmuhsitna hi a tam hle niin an sawi a. Season dangte nen khaikhinin season hman zawh takah khan hetiang lam hawi hi 43% zetin a pung niin an sawi.

Chi inthliarna a nasat belh zel avang hian FA chuan nasa zawka hma lak chhoh an tum phah a. Kar hmasa lawkah pawh khan Chelsea chuan an club tantu pakhat chu dam chhung atan an hrem chiah a. An hrem tak hian season hman zawh taka Stamford Bridge-a an match hnuhnung bera Manchester City nen an inkhelh tumin Raheem Sterling chu mawi lo takin a lo tawng khum a ni.

Khawvela football lama thuneitu sang ber FIFA chuan thla hmasaah khan chi inthliarna lama inhnamhnawihte hremna chu a hma aia na zawk ni turin thu an titlu bawk a. Tun hnaia thil thlengte thlirin hetiang lama inhnamhnawih tih an hriat chiante chu match 10 chhung hrem turin thu an titlu a ni.

FA pawh hian chi inthliarnaa inhnamhnawih chu an man tirhin match 6 chhung an hrem phawt ang a, an dinhmun azirin hei aia rei pawh hi hrem theih turin thu an dah a. Khelmual chhung leh pawnah nasa takin hma an la chho dawn niin an sawi.

“Football Association chuan chi inthliarna lama inhnamhnawih hi a tlem berah match 6 chhung kan hrem dawn a, hei hi a boruak azirin a aia rei pawh a ni thei dawn a. Chi inthliarna hi um bo a nih theihna turin theihtawp kan chhuah dawn a ni,” tiin FA chuan thu chhuah an siam.

Inkhelh laiin match official te hnenah FA chuan manager leh club staff te chu yellow card leh red card pek phalna an pe a. Manager te leh staff dangte awm dan azirin heng card te hi inthlahrung hauh loa pe zel turin thuneihna hi an pe a ni.

Team pakhat technical staff zinga miin season khat chhungin yellow card vawi 4 a hmu tling a nih chuan game khat chhung chu khelmual sira awm an phalsak dawn lo a. Yellow card pariat an hmuh chuan match hnih chhung an hrem zel dawn a ni.

Mi pakhatin season khat chhunga yellow card vawi 16 a hmuh tlin chuan nungchang mawi loh vangin an hrem ang a, a hranpain a chungthu ngaihtuah a ni thin dawn a ni.

Copyright © inkhel.com 2024. All rights reserved.