Sunday zing khan tun hnaia heavyweight boxing bout nghahhleh awm ber neih a ni a, Deontay Wilder leh Tyson Fury-te chu a vawi hnih nan an inhnek.

Wilder hian Fury hi a hneh lo hle a, round 7-naah Wilder-a corner hian ring chhungah towel var vawm lutin, referee chuan inhnek a titawp nghala, British boxer Fury chu chakin, WBC world heavyweight champion thar a ni.

A corner lamin towel var an rawn vawm lut a ta mai kha Wilder chu a lung a awi chiah lova, la inhnek thei niin a insawia, a sawi hmangah hliam tenau a nei sa niin a ngaih theih.

Wilder chuan, “Heti ang hi chu thil thleng thei a ni a, boxer tha zawk in hnehna a chang a ni mai. Inhnek tur khan ka la inpeih renga, he fight atan hian thil buaipui tur ka ngah hle a, kan inhnek hma khan thil dang neuh neuh avangin ka ke kha a zawi sa.

“Chhuanlam eng mah ka siam lova, mahse ka corner kha chuan min la inhnek tir se chu ka ti hle. Indo mi ka ni a, hei hi ka thil tih thin pangngai a ni a, chhuanlam tur ka nei lo, a aia chakin ka rawn kir ang,” a ti.

Wilder-a trainer Jay Deas chuan towel var an vawm luh chungchang sawiin, “Towel vawm lut tu kha Mark Breland a ni a, keichuan vawm lut lo se ka ti,” a ti ve bawk.