Suzuki Gixxer Pro Volleyball League khelh mekah April ni 23, Thawhlehni zan Chhinga Veng Spikers chuan 4-1 (15-7, 15-4, 11-15, 15-13, 20-18) in TNT an hneh. RS Traders Player of the Night-ah Chhinga Veng Spikers Mandeep Singh thlan a ni a, RS Traders Fan of the Night-ah Dinpuii (TNT) chu thlan ani bawk.
Chhinga Veng Spikers-in semifinal lut thei turin hma lam an pan a, thawhlehni zan Suzuki Gixxer Pro Volleyball League-ah 15-7, 15-4, 11-15, 15-13, 20-18 in TNT an hneh.
Chawnpui Sports Centre-ah Mandeep Singh chuan dan theih loh leh filawr takin a khel. Chhinga Veng chak nan point 37 hlawh chhuakin team pumpui point hmuh atangin 47% chuang a ni a, point 11 a paih ve thung.
Tuichangral lakah India senior team tana khel tawh Mandeep chuan chungnung takin Chhinga Veng a chakpui tawh. Vawi hnih an khelhah Spikers-in point kua hmuin hnehna an chang ve ve a, Mandeep chuan RS Trader Player of the Night lawmman a dawng ve ve.
Mizo hlanga khel TNT an tlawm zawn ve thung a, champion lai Hunthar an hneh loh hnuah nawi takin Chhinga Veng lakah bul an tan. Set hnih an inkhelh chhungin kawng engkimah an bet a, point 11 chiah an thawk chhuak.
Mahse, set thumnaah Laldinchhunga'n TNT a fuih phur a, rin phak bakin kawng dikah an kir leh. A tawp thlengin el thamin Muanna Veng team inlan zui mah se set hnuhnung pahnihah Chhinga Veng an insiam tha a, point pawimawhah danglamna siam turin an hriam zawk.
Spikers tan Mizo player zingah Lallianmawia Pachuau chuan point kua hmuin vawi sarih a tisual. Mandeep-an hmun pawimawh tak a luah a, F Lalngilneia'n point nga hlawhin point li a paih a, Joel Laldinsanga'n vawi thum vaw tla mah se point hnih a hloh.
A tir atanga set hnihna tawp thlengin Chhinga Vengin nuam ti takin an khel a, engkim a awlsam vek. Ball kang vuak thlak loh an nei mang lo va, lehlam hlap an dang bet tlat bawk a, TNT-in chet ngaihna an hreh lo.
Tho kang leh thei tawh lo hial turin point 7 leh point 4 chiah set hnih an khelh chhungin Muanna Veng team-in an hmu. Mahse, boruak thar hipin huaisen takin an nawr let thut a, set thumna tirah 5-0 in hma an hruai.
Chhinga Veng tanhmun a phet a, point 11 chiah hmu ve hmanin a vawi khat nan set an hloh. Player naupang beiseiawm Dinchhunga'n an inkhelh chhungin point 12 hmuin vawi thum a tisual a, TNT tana thawh hlawk ber a ni. Set thumna an lak theih nan vawi li hlap tlain point hloh a nei lo.
Set linaah an inkhel tawk hle. Chhinga Vengin hun pawimawhah danglamna siam thei an neih avangin TNT an beng hniam thei a, 13-13 a nih hnuah Mandeep chuan point hlu tak a hmu zawn a, Spikers an tlang.
Set hnuhnung berah an inbei tawk leh zual a, set thum an hloh tawh avangin an chak lo tih chiang tawh mah se TNT-in set hnih lak tumin an bei nasa. Point khat hmuh belha set la thei turin hun tha vawi hnih an nei.
Dinchhunga'n a awlah dahin 14-13 in TNT-in hma an hruai. A hnuah captain Vanlalchhantluanga Sailo chuan hlap tla ve lehin 15-14 in an sang leh. Mahse, Mandeep chuan a dang ve ve a, vawi nga an deuce hnuah Chhinga Veng an dingchang.
TNT tan Chhangtluanga'n point riat hmuin vawi ruk a tisual. Hosanna Lalawmpuia'n point sarih thawk chhuakin point thum a paih a, set thumna bikah Dinchhunga ang bawkin a che tha a, point thum hmuin hloh a nei lo. Sadraka'n a pumpuiah point thum hmuin paih a nei lo a ni.
Vawi hnih an khelh tawhah TNT an tlawm ve ve a, chutih rualin Hunthar hmaah set hnih lain Spikers lakah set khat an thawk chhuak bawk a, point thum an hmu tawh. Kar leh thawhtanni zanah Chanmari West nen an inkhel leh ang.
Team sarih inel zingah Chhinga Vengin hma an hruai a, khelh li la nei mah se semifinal an hlat tawh lo. Tun kar inrinni zanah Anastasia Electric Veng nen an insu dawn a, fiahna tling inkhel a ni ngei dawn a ni.
Junior league-ah Chhinga Veng rawlthar rualin TNT an hneh bawk a, set hmasa ber an hloh hnuah thum lain 16-18, 15-12, 19-17, 8-15, 15-10 in an chak.
April 25, Ningani - 8:00pm Fixtures
Chanmari West v Hunthar
April 25, Ningani - 6:00pm
Chanmari West U18 v Hunthar U18
(adsbygoogle = window.adsbygoogle || []).push({});