October ni 25, Ningani tlai Mc Dowell's No 1 Soda Mizoram Premier League (MPL) Season 7 Round 9 match hmasa ber Champion lai Chhinga Veng FC leh vawi hnih Champion tawh Chanmari FC inkhelah goal lut awmlo in an inhneh tawk a, point khat ve ve an hlawh chhuak. He inkhelah hian Chhinga Veng FC goalkeeper T. Zothanmawia (T. Mawia) chu Man of the match-ah thlan a ni.
Team pahnih te hi round 7-ah inhmachhawn tawhin Chhinga Veng FC hian 1-0 in hnehna an chang a, an intawn vawihnih naah erawh chungnung zawk awmlo in an inhneh tawk. Chhinga Veng FC hian khelh tawhah point 22 neiin hmahruaitu an nih chhunzawm zel a, Chanmari FC hian point 11 neiin pangana an hauh mek bawk
03:00 PM Chhinga Veng FC 0-0 Chanmari FC
MoM: T. Zothanmawia, Chhinga Veng FC
Inkhel tan a ni a, team pahnih te an innawr tawn zak zak hnuah Chanmari FC chuan goal thunna hun tha nei hmasa zawkin mual dinglam sir a tang a, Thomas Lalengkima ball vawrh luh chu box chhunga awm MC Malsawmzuala chuan a tauh goal ngei dawn nia alan laiin Chhinga Veng FC keeper T. Mawia chuan a dang sak a. Box chhung chiah a tang a, MC Malsawmzuala shot tha zet chu T. Mawia chuan a dang leh bawk.
Chhinga Veng FC pawhin goal thunna hun neiin Romawia'n ball tha a hmuh chu box-ah la lutin Chanmari FC keeper MS Dawngliana chiah a hmachhawn hnuah MS Dawngliana chuan a dan sak a, Mual dinglam sir a tang a Romawia ball pek box chhung chiah a tang a Dawngtea shot chu goal sirah chiah a kal bawk. Goal lut awmlo in hun chanve an hmang zo.
Second half-ah Chhinga Veng FC chuan goal thun ngei tumin foreigner midfielder Gatch Diomande leh Lalneihdika te coach Sanga chuan luh tir mahse danglamna erawh an thlen thei lo.
Chanmari FC coach thar Chawnga chuan Laldampuia, Lalnunzama leh C. Lalhriatpuia te luh tirin an goal bawh ana sawt a, MC Malsawmzuala'n Chhinga Veng FC keeper T. Mawia chiah a hmachhawn hnuah goal a khung lo. Rochhingpuia corner pet tha zet chu Rosanga chuan a tauh goal ngei dawnin lang mahse Chhinga Veng FC keeper T. Mawia chuan a dan sak. Rosanga ball vawrh luh tha zet box pawn chiah a tang a Vanlalbiaa Chhangte shot chu Chhinga Veng FC keeper T. Mawia chuan a dan dak bawk.
Chhinga Veng FC pawhin huntawp dawnah goal thunna hun tha neiin box pawn chiah a tang a Romawia shot chu Chanmari FC keeper MS Dawngliana dinglam sirah chiah a kal a, injury time-ah Chhinga Veng FC keeper T. Mawia'n freekick a tang a ball a vawrh luh chu Romawia chuan chiang zetin pet goal mahse offside avangin goal-ah pawm a ni lo a, goal lut lo in huntawpin a nang zui ta a ni.
(adsbygoogle = window.adsbygoogle || []).push({});