​Chhinga Veng FC-in Electric Veng FC an hneh

19th October 2018, 04:10AM

October ni 18, Ningani zan khan AR Lammualah Mc Dowell's No 1 Soda Mizoram Premier League (MPL) Season 7 Round 8 match vawi thumna table pahnihna kai thar Electric Veng FC leh hmahruaitu Champion lai Chhinga Veng FC inkhelah Chhinga Veng FC chuan sikhat faiin Electric Veng FC an hneh a, point thum an hlawh chhuak. Goal awm chhun hi second half-a lut a ni a, Chhinga Veng FC forward Lalromawia chuan a khung a, Man of the match-ah thlan nghal a ni.

Team pahnih te hi Round 6-ah inhmachhawn tawhin Chhinga Veng FC hian 2-1 in anhneh a, an intawn vawi hnihnaah Chhinga Veng FC chungnung zawkah an tang leh ta a ni. Hneh loh nei lo Sangzuala Hmar leh a hote hian an record an la hum zel a, point 22 neiin hmahruitu an nih chhunzawm zel a ni. Electric Veng FC hi kai thar ni mahse Chhinga Veng FC chiah hneh loh an la nei a, point 16 neiin pahnihna an nih chhun zawm zel bawk.

Electric Veng FC 0-1 Chhinga Veng FC

(Lalromawia 47'

MoM:Lalromawia, Chhinga Veng FC

First half-ah goal hlauhawm hmuh tur a tam lo a, inkhel thununtu zawk awm lo in team pahnih te an innawr tawn zak zak hnuah Chhinga Veng FC chuan goal thunna hun tha nei hmasa zawkin Vanlalchhuanga ball vawrh luh chu box chhunga awm Romawia chuan goal kham chung chiahah a tauh a, Dawngtea'n box pawn chiah atangin goal kham chungah chiah a shot bawk.

Electric Veng FC pawhin goal thunna hun tha neiin Isak Vanlalpeka freekick tha zet chu a goal dawn nia a lan laiin Chhinga Veng FC keeper T. Mawia chuan a dang hman. Goal lut lo in chawlh lawk an hmang zui ta a ni.

Second half tan a ni a, minute 2 aral hmain Chhinga Veng FC chuan an hun tha neih hmang tangkaiin mual veilam sir a tang a Rammawia ball pek fing tak chu box chhung chiah atangin Romawia chuan Electric Veng FC keeper veilam sir kilah mawi tak a pet goal-in an hmahruaina a khung.

Electric Veng FC chuan an siphurh sut ngei tumin an nawr let a, Vanlalremsanga, Vanlalremruata leh David Lalchhuanawma ten Chhinga Veng FC keeper T. Mawia tan hna hautak an siam lo a, Isak Vanlalpeka freekick tha zet chu Chhinga Veng FC keeper T. mawia chuan a dan sak bawk.

Chhinga Veng FC pawhin huntawp dawnah goal thun belhna hun tha neiin Sawmzela'n ball tha a hmuh chu box chhungah um lutin kawh zet a a shot chu goal sirah chiah a kal.  Goal luh belh lo in Chhinga Veng FC chuan 1-0 in hnehna an chang ta a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.