Dowell's No 1 Soda Mizoram Premier League (MPL) Season 7 round 7 match hnuhnung ber chu October ni 13, Inrinni tlai khan Serchhip Hmar Veng Sport Complex field-ah Chhinga Veng FC leh Chanmari FC ten an khel a, Chhinga Veng FC chuan Lalrammawia goal khat hmangin Chanmari FC an hneh a, He inkhelah hian Chhinga Veng FC defender PC Laldinpuia chu Man of the match-ah thlan a ni.
(adsbygoogle = window.adsbygoogle || []).push({});
Chanmari FC hian a zawn a match hnih an chak loh hnuah Mizoram Police FC 1-0 in an hneh a, Serchhip khelmualah point hlawh chhuak turin theih tawp chhuah mahse Chhinga Veng FC an hneh lo.
Lalsangzuala Hmar leh a hote hian hneh loh an la nei lo a, Serchhip khelmualah pawh an theihna lantir chhunzawm zelin Chanmari FC lakah point 3 an hlawh chhuak a, hmahruaitu an nih chhunzawm zel a ni.
Chanmari FC 0-1Chhinga Veng FC
(Lalrammawia 74')
MoM: PC Laldinpuia, Chhinga Veng FC
Inkhel tan a ni a, team pahnih te an innawr tawn zak zak hnuah Chhinga Veng FC chuan goal thunna hun tha nei hmasa zawkin Lalrinchhana ball pek tha zet chu Sawmzela chuan box-ah la lutin Chanmari FC keeper MS Dawngliana chiah a hmachhawn hnuah MS Dawngliana chuan a dan sak.
Chanmari FC pawhin goal thunna hun tha nei ve bawkin Lalnunzama chuan a hun tha a hloh a, Dampuia leh Vanlalbiaa Chhangte pawhin hun tha nei bawk mahse Chhinga Veng FC keeper T. Mawia tan hna hautak an siam lo.
Chhinga Veng FC chuan first half huntawp dawnah goal thunna hun an nei leh a, mual dinglam sir a tanga Ramawia ball pek tha zet chu box chhung a awm Dawngtea shot chu Chanmari FC keeper Dawngliana'n a dan sak a, goal lut awm lo in chawlh lawk an hmang zui ta a ni.
Second half-ah Chanmari FC chuan goal thun ngei tumin Coach Lalruatliana Sailo chuan MC Malsawmzuala leh Thasiama luh tirin an goal bawh a na sawt a, goal thunna hun tha nei nghalin mual dinglam sir a tang a Thomas Lalengkima ball vawrh luh tha zet chu box chhunga awm MC Malsawmzuala chuan goal kham chhungah chiah a tauh.
Chhinga Veng FC chuan minute 74-ah an hun tha neih hmang tangkaiin box chhungah Sawmzela leh Romawia chuan Chanmari defender te an thiat hnuah ball tha bik Romawia chuan Lalrammawia tan a pek chu Rammawia chuan an hmahruaina goal niturin a khung.
Chanmari FC chuan an siphurh sut ngei tumin nasa takin an nawr a, huntawp dawnah MC Malsawmzuala freekick tha zet chu a goal ngei dawn nia a lan laiin Chhinga Veng FC keeper T. Mawia chuan a dang hman a Chhinga Veng Fac an him hram. Goal luh belh lo in Chhinga Veng FC chuan 1-0 in hnehna an chang ta a ni.
(adsbygoogle = window.adsbygoogle || []).push({});