​Chhinga Veng FC-in Barrackpore RAC an hneh

04th March 2019, 10:03PM

Hero 2nd Division League 2018-19 khelh mekah March ni 4, Thawhtanni khan Rajiv Gandhi Stadium, Mualpuiah Chhinga Veng FC chuan 3-1in mikhual Barrackpore RAC an hneh a, point 3 anhlawh chhuak.

Mizo Club Chhinga Veng hian match ruk khel tawhin point 16 an nei mek. Group C-ah hian ATK Reserves TRAU FC, New Barrackpore RAC, Mohammed SC leh Jamshedpur FC Reserves te nen an awm, March ni 19, Thawhtanni chawhnu dar 2:00-ah Rajiv Gandhi Stadium, Mualpuiah Jamshedpur FC nen an inhmachhawn leh ang.

Goal lut te hi first half leh second half-a lut an ni a, Chhinga Veng tan Emanuel HS Lalthazuala chu hattrick a siam a, Barrackpore RAC tan Ayeni Joel Sunday Yinka chuan goal khat a khung ve bawk.

10:00 PM Chhinga Veng FC 3-1 Barrackpore RAC

(Imanuel HS Lalthazuala 23', 64', (P) 88' (P) ) (Ayeni Joel Sunday Yinka 43')

First half-ah goal hnih a lut a, goal lut hmasa ber hi inkhel tan a tang a minute 23-a lut a ni a, Chhinga Veng tan mual dinglam sir a tang a, Lalrammawia ball vawrh luh tha zet chu box chhunga awm defender Imanuel HS Lalrhazuala chuan chiang zetin a pet lut.

New Barrackpore RAC tan huntawp dawn minute 2 ala awmin mual veilam sir a tang a midfielder Sujay Dutta ball vawrh luh chu box chhunga awm Nigerian forward Ayeni Joel Sunday chuan mawi takin an siphurh a rul. 

First half-ah team pahnih te in an intluk tawk hle a, Chhinga Veng chuan goal thunna hun an nei hmasa zawk a, Lalrammawia freekick tha zet chu box chhunga awm Lalliansanga a pet thelh. New Barrackpore RAC pawhin goal thun belhna hun tha vawi hnih an hlah a, midfielder Suraj Mahato leh forward ayeni Joel Dunday shot tha zet chu Chhinga Veng keeper Zothalanmawia (T Mawia) chuan a dan sak ve ve bawk. 

Second half-ah goal hnih bawk a luh belh a, minute 64-ah New Barrackpore RAC defender Emmanuel Chigoza chuan penalty box-ah ball a khawih fuh avangin referee chuan penalty a ham a, Chhinga Veng tan Emanuel HS Lalthazuala chuan goal-ah chantirin an goal hnihna a khung.

Huntawp dawn minute 2 ala awmin Chhinga Veng tan bench a tang a lut Lalmuanzova chuan penalty an hlawh chhuak a, Imanuel HS Lalthazuala bawk rawn ding chhuakin a hattrick siamna goal a khung. Goal dang luh belh tawh lo in Chhinga Veng chuan 3-1 in hnehna an chang zui ta a ni.

Second half-ah pawh team pahnih te an in hneh tawk hle a, Chhinga Veng tan midfielder Thasiama chuan goal thun belhna hun tha a hloh a, Nwe Barrackpore RAC tan bech a tang a lut midfielder Paltu Das leh Rajdeep Saha chuan an hun tha neih an hloh ve bawk.

(adsbygoogle = window.adsbygoogle || []).push({});

Copyright © inkhel.com 2024. All rights reserved.