Hero 2nd Division League 2018-19 khelh mekah February ni 28, Ningani khan Rajiv Gandhi Stadium, Mualpuiah Chhinga Veng FC chuan 3-1 in mikhual ATK Reserves an hneh a, Group C-ah hmahruaitu an ni mek.
Goal lut te hi first hlaf leh second half-a lut an ni a, Chhinga Veng FC tan Vanlalbiaa Chhangte, Godwin Quashiga leh Lalliansanga te chuan goal khat theuh an khung a, ATK Reserves tan Ashish Jha chuan goal khat a khung ve bawk.
Mizo Club Chhinga Veng hian match nga khel tawhin point 13 an nei mek. Group C-ah hian ATK Reserves TRAU FC, New Barrackpore RAC, Mohammed SC leh Jamshedpur FC Reserves te nen an awm. March ni 4, Thawhtanni zing dar 9:00-ah Rajiv Gandhi Stadium, Mualpuiah New Barrackpore RAC nen an inhmachhawn leh ang.
02:00 PM Chhinga Veng FC 3-1ATK Reserves
(Vanlalbiaa Chhangte 26', Godwin Quashiga 52', Lalliansanga 65') (Ashish Jha 72')
Chhinga Veng FC XI: Godwin Quashiga, PC. Laldinpuia, Lalliansanga, Thasiama, Imanuel HS Lalthazuala, Lalromawia, Lalrammawia, Zothanmawia, Vanlalbiaa Chhangte, Vanlalzuidika, MS Dawngliana.
ATK Reserves XI: Asraf Ali Mondal, Sumit Rathi, Yumnam Gopi Singh, Joseph Vanlalhruaia, Aman Thapa, Brandon Green, Thomyo L. Shimray, Ragav Gupta, Buanthunglun Samte, Nabi Hussain Khan, Jedidi Haokip.
Inkhel tan a ni a, Chhinga Veng chuan inkhel thunun nghalin goal thunna hun tha an nei nghal a, box chhung chiah a tang a, Vanlalbiaa Chhangte goal shot tha zet chu ATK Reserves keeper Jedidi Haokip chuan a dan sak.
Mual dinglam sir a tang a, Rammawia ball pek tha zet chu box chhunga awm MS Dawngliana chuan goal sirah chiah a tauh hnuah MS Dawngliana chuan ATK Reserves keeper Jedidi Haokip chiah a hmachhawn tawh hnuin Defender Brandon Green chuan a dang hman hlauh.
Chhinga Veng chuan nawr chhun zawmin minute 26-ah box chhung a tang a Lalliansanga shot tha zet ATK Reserves keeper ATK Reserves keeper Jedidi Haokip danper nangchinin Vanlalbiaa Chhangte chuan mawi takin an hmahruaina goal a khung ta a ni.
Chhinga Veng chuan first half huntawp dawnah goal thun belhna hun neiin Lalliansanga chuan goal ban a petper a, goal luh belh tawh lovin Chhinga Veng chuan 1-0 a hmahruaiin chawlhlawk an hmang zui ta a ni.
Second half tan a ni a, Chhinga Veng bawk chungnung zawkah tangin minute 52-ah mual dinglam sir a tang a, Lalrammawia ball vawrh luh tha zet chu box chhunga awm Ghana defender Godwin Quashiga chuan mawi tak a tauh lutin an goal hnihna a khung.
Chhinga Veng chuan nawr chhunzawmin minute 65-ah an hun tha neih an hmang tangkai zui leh a, MS Dawngliana ball pek fing zet chu Lalliansanga chuan box-ah lalutin an goal thumna a khung leh bawk.
ATK Reserves chuan goal thun ngei tumin counter attack-in an nawr let a, minute 72-ah bench a tang a lut forward Ashish Jha chuan half way line pelh hret a tangin an goal khatna mawi takin khung mahse, an siphurh erawh an sut zo thei lo. Hun tawp thlengin goal dang a luh belh tawh lo a, Chhinga Veng chuan 3-1 a hnehna changin point thum hlutak an hlawh chhuak ta a ni.
(adsbygoogle = window.adsbygoogle || []).push({});