Chhinga Veng chakna Mandeep Singh

18th April 2019, 06:04PM

April ni 17, Nilaini zan khan Pro Volleyball League khelh chhunzawm a ni a, Chhinga Veng Spikers Mandeep Singh chuan filawr takin a khel a, 15-11, 15-13, 18-16, 15-10, 15-11 (5-0) in Tuichangral an hneh.

Chawnpui Sports Centre-ah India senior team rinrawl lo ni tawh thin Mandeep a langsar hle a, RS Traders Player of the Night-a thlan a ni. Chhinga Vengin a tha thei ang berin bul an tan a, set nga la fai vekin point awm thei zawng zawng an hlawh chhuak.

Nikuma final lut Tuichangralin insawrbingna leh inzawmkhawmna tha an tlachham a, point pawimawhah ho taka an tihsual an tuar. An khelh hmasak berah point khat mah an hmuh loh avangin an hmabak a hautak zui ang.

2017 khan a vawi khat nan Pro Volleyball-ah Chhinga Veng an tel a, Mandeep leh Gurinder Singh an tangkaipui hle a, final an lut. Kum khat an awl hnuah Mizoram volleyball inelna sang berah an kir leh a, Mandeep an ko kir ve leh nghal.

Set nga an inkhelh chhungin Mandeep chuan point 33 thawk chhuakin point riat a hloh. Spikers tan Mizo player zingah point 10 hmu phak an awm lo va, Lallianmawia Pachuau chuan point kua hlawhin vawi khat a tisual a ni.

Tuichangral tan Jaideep Singh chuan tum 24 vaw tlain vawi sarih a tisual a, amah thlawp thei ber Lalrinchhana'n point kua hmuin point li a paih. An ball vawrh a tha tawk lo va, player dang mi mala point nga hmu phak an awm lo.

A tir atangin inringtawk takin Chhinga Vengin bul an tan a, derthawng lovin set hmasa berah hma an hruai tluan. Set hnihnaah Jaideep chuan Tuichanhgral boruak siam thain set beisei ngam turin 9-6 in hma an hruai hman.

Mahse, Mandeep chuan Jaideep hliah khuhin 12-11 in Spikers-in an lehpel a, hawi kir lovin set an la zawn. Set thumnaah Chhinga Vengin Hunthar atanga an lak luh Lianmawia a tangkai a, Tuichangral insiam thain thawhhona tha zawk nen an khel ve thung.

Khaw chhak team tan Lalnunfima leh Jaideep chuan vaw tla zawnin 15-14 a ni a, point khat hmu leh se set la thei tur dinhmun thaah an inhung a, inkhel boruak a nung. Mahse, Lalhmunmawia'n a service dik lo va, ho taka point an hloh hnuin Chhinga Vengin an nawr let. Vawi thum an deuce hnuah Mandeep chuan hlap tla zawnin 18-16 in Spikers an tlang.

Set thum an lak zawn hnuin Chhinga Veng an intel ruh leh zual a, inringtawk takin a tawp thlengin an khel. Captain leh setter David Lalramhmachhuana'n tha takin a siam a, F Lalngilneia'n lehlam vuak a dan that bakah awmzia a nei a, an inkhelh chhungin point ruk hmuin vawi khat a tisual.

Tuichangralin an khing let zo tawh lo va, set hnuhnung pahnihah point 11 ve ve chiah hmuin an tawp. Mandeep-a vuak leh service-in a tibuai a, lehlam service an lak fuh tawk loh thin an tuar hle a ni.

Chhinga Vengin kar leh thawhlehni zanah TNT an bitum leh dawn a, nilaini zanah Tuichangral leh 2016 champion Anastasia Electric Veng an inkhel ve thung ang.

Inkhel vawi hnih awm tawhah Chhinga Veng leh Durtlang North-in set nga la fai ve vein point nga an hmu nghal. Thawhlehni zanah tan a ni a, Durtlang North-in set hloh lovin Chanmari West an hneh tawh a ni.

Junior league-ah 16-14, 13-15, 13-15, 15-7, 15-7 (3-2) in Chhinga Veng an chak bawk a, Tuichangral lakah an chungnung tluan. A hmain Chanmari West-in 3-2 thovin Durtlang North an hneh.

April 20, Inrinni zan dar 8:00-ah khelh chhunzawm leh a ni ang a, Hunthar VC leh  TNT an in hmachhawn ang a, 

Copyright © inkhel.com 2024. All rights reserved.