English Premier League-a team thar tur Bournemouth chuan Southampton atangin Poland international goalkeeper Artur Boruc an lalut a, kum khat daih contract an ziahpui.

Kum 35 mi Boruc hian tun season khelh zawh takah khan loan-in Bournemouth tan hian alo khel tawh a, game 39 khelin Championship-ah a champion pui bawk.

A tirah chuan hunreilote chhung atan Cherries hi a zawm a, mahse season tluan atan pawhsei leh a ni. Bournemouth-ah hian a che tha a, goal chhuahlohna game 18-ah a nei thei a mahse Thawhlehnia Southampton-in player paruk an chhuahtir (release) zingah a tel.

Saints hian Boruc bakah Jos Hooiveld (defender), Cody Cropper (goalkeeper), Chris Johns (goalkeeper), Omar Rowe (winger) leh Jake Sinclair (striker)-te an chhuah tir a, kum 32 mi Hooiveld hi chuan season tawp hma thla khat kha Millwall-ah loan-in a khel.

Boruc hian kum 2012 September thla khan Italian club Fiorentina atangin Southampton hi a zawm a, Premier League-ah Saints tan hian game 50 a khel hman.

A hun hmasa lam chu Celtic-ah a hmang a, Scottish club hi Scottish Premier League nomawi vawithum chawipuiin Scottish League Cup vawihnih a chawipui bawk a Scottish Cup-ah pawh vawikhat an champion.

Upa tawh viau mahse ram tan khel turin koh ala ni pha a, mahse Arsenal goalkeeeper Wojciech Szczesny leh Swansea City goalkeeper Lukasz Fabianski-te nen khelhna hmun an inchuh reng.