08 Jun 2015 07:25

digimalt

​Chennai-ah Malsawmdawngliana che tha

FMSCI Indian National Mortorcycling Racing Championship, 2015 Round 1 June ni 5 atanga ni 7 chhunga Coimbatore, Chennai-a neihah Mizo rider Malsawmdawngliana chuan category pathumah podium a chang.

Yamaha R-15 intihsiak, 165 cc Group D National championship leh Suzuki Company-in an buatsaih One Make Race-a Gixxer 150cc inelnaahte Malsawmdawngliana hi a inlan a, Mizoram MotorSports Association (MiMSA) rider Malsawmdawngliana hian intlansiak pathum zinga pahnihah pathumna a ni a, R 10 Suzuki Gixxer Cup Novice Race 2-ah phei chuan pahnihna a ni nghe nghe.

Malsawmdawngliana hi Chennai intlansiakna kawngah hian a mikhual tawh lem lova, novice class atanga bul tan chhovin a thiam rual inelna huangah a lut chho ta zel a ni.

Chennai bakah Formula One-a Indian GP tlanna kawng Noida-a Buddh International Circuit-ah nikum khan Federation of MotorSports Club of India (F.M.S.C.I) One Make Race-ah CBR Honda 150 CC khalhin Novice class-ah pahnihna a lo ni tawh bawk.

Malsawmdawngliani hi Mizoram racing hnuhnung ber May thlatira Suszuki 10th MiMSA Motorcycle Racing Championship 2015-ah khan 161-250cc Expert Stock Class-ah pahnihna a ni bawk a ni.