12 Jun 2019 12:27

bakteaJr.

Mizo tlangval

​Chelsea tan Lampard a that ringtu Rio Ferdinand

Chelsea chuan an manager Maurizio Sarri chu season khat an rawih hnuin an chhuah tir leh dawn niin a langa, Sarri thlaktu tur hi chanchinbu mite chuan an inrinsiak nasa viau a, Chelsea legend Frank Lampard-a hming a ri ring hle.

Lampard hi tunah hian Championship team Derby County manager a ni meka, Derby hi a club enkawl hmasak ber niin nikum nipui lai khan a enkawl tan. Lampard hi a che chhe lo hle a, Derby hi play-off final thlenpuiin, final-ah erawh Aston Villa hneh lovin, season tharah Premier League an khel thei dawn lo.

Manchester United defender hlui, tuna football pundit ni ta Rio Ferdinand chuan England tana a lo khelhpui thin Lampard chu Chelsea-ah a that a rin thu a sawi a, tawnhriat nei tha rih lo mahse Pep Guardio pawhin Barcelona a enkawl tirh lai khan tawnhriat a neih bik loh thu a sawi.

Ferdinand chuan, “Frank hi Chelsea mamawh dik tak niin ka hria a, mi thenkhat chuan tawnhriat a neih loh thu an sawi thin; mahse Pep pawh khan Barcelona a enkawl khan tawnhriat a nei bik lo. Frank hian Chelsea a hrechiang a, player-te a hria a, player-te pawhin an zah dawn.

“Frank hi media-te hmaah a buai lova, club chhungah season khat chhungin thil a thlak danglam thei tih pawh a lantir tawh. Chelsea hi bazar thei lo tura hrem an nih dawn tak tak chuan Frank aia tha hi thlan tur an neiin ka hre lo takzet; a chhan chu Frank leh Jody-te hian Chelsea  player kum 16 chin hi an hre sa veka, an tih theih pawh an hre sa vek a ni,” a ti.

Ferdinand-a sawi Jody hi Jody Morris niin , Chelsea academy player lam a lo enkawl reng tawh thin a, tunah hian Derby-ah Lampard-a assistant a ni mek a ni.