Ningani zan zanlai hian Manchester United chuan sum hmang hnem tak Chelsea an mikhual dawn, Erik ten Hag chuan sum hman tam ringawt hi chet thatna a nih loh zia a hre chiang.
Chelsea neitu thar Todd Boehly chuan transfer window vawi hnih a hmachhawn takah khan, £600million vel player thar lei nan sum a hmang hem mai.
Blues hian sum hmang hnem viau mah se, tun season Premier League table-ah 12-na an ni mek. Thomas Tuchel an ban a, Graham Potter an la lut. Tunah Caretaker Frank Lampard chuan Chelsea a enkawl mek.
Player thar an lei dan chungchangah Chelsea hian dem an hlawh a, an mamawh player lei lova, transfer market-a player lei theih an hmuh apiang an lei khawm nia ngaih a ni.
Manchester United pawh hian player thar lak nan sum chu an lo seng ve nasa hle. Executive vice-chairman Ed Woodward-a hnuaiah kum 9 chhungin player thar lei nan £1billion vel sum an seng.
Kum 9 liamta chhung khan Premier League title an hlawhchhuak lo a, table-ah vawi hnih pahnihna an ni. Anni pawh player thar lak nan sum seng hnem mah se, an result-ah erawh a lang bik lem lo tih a chiang.
"Premier League-ah hian player tha tak tak an tam a, manager tha ber ber an awm bawk. Tin, sum pawh a tam hle bawk, hei hian Premier League hi competition hautak leh har berah a chhuah kan ti thei awm e.
"Sum chu tam mah se, a nihna turah tak hman hi a ngai dawn a ni. Ngaihtuahna fim tak hmang chungin, player thar lei nan sum hman a finthlak dawn, chuti lo chu awmze nei loin sum tam tak a khawhral theih tlat mai," tiin United boss Erik ten Hag chuan sum chungchanga ngaihtuahna fing neih a ngaih thu a sawi chhuak.
"Premier League-ah hian team khawng tak tak an awm teuh mai. Aston Villa te, Brighton te, Brentford te pawh hi team khawng leh hmachhawn hautak em em an ni. Big 6 tia an sawi ho chiah hi team hmachhawn harsa an ni lo a nia.
"Tin, season thar phei chu a hma zawng aiin top 4 inchuhna hi a hautak zawk tawh dawn bawk a, nipui bazar kan hmachhawn bawk nen, eng nge thleng tur kan hre lawk lo, team tin an inla tha dawn, season thar chu a hma aiin a hautak leh sawt dawn a ni," tiin Ten Hag chuan Premier League season thar chungchang a thlir bawk.