Chelsea chuan Liam Delap an la lut fel ta a, kum 6 chhung atan contract an ziahpui.

May ni 29 khan Chelsea leh Ipswich Town te chu England Under 21 international chungchangah an inrem tawh a, nizan zanlaiah khan Chelsea chuan kum 22 mi Liam Delap hi an la lut fel ta a ni.

Delap hian release clause £30million ($40m) a nei a, hei hi Chelsea chuan pek an inhuam a, amah Delap pawhin club lian dang sawmna hnawlin Chelsea a thlang bawk a, indawrna a kaltluang em em a ni.

Chelsea chuan Ipswich Town hnenah £20m an pe phawt ang a, a hnuah an inpek chhunzawm leh dawn a ni.

Manchester United, Newcastle United, Everton, Nottingham Forest, AC Milan leh Juventus te chuan Liam Delap hi an duh a, Manchester United phei chuan lak tumin an dawr, hetih lai hian Chelsea a thlang ta a ni.

2024-25 season liamta khan Delap hian Premier League goal 12 a khung a, hetih lai hian an club an chetha lo a, 19-na niin Championship division lamah an tla thla ta a, season liamta khan competition hrang hrangah Delap hian game 40 a khel a ni.

A naupan laiin Derby County-ah hun a hmang a, kum 2019 khan Manchester City Academy a zawm leh. First team-ah game 6 chiah a khel hman tihin, Championship club Stoke City, Preston North Eand leh Hull City lamah te loan-in a kal kual a, kum 2024 July thla khan Ipswich Town chuan £15m ($19.2m)-in an lei ta a ni.

England Under 21 team tan game 12 a khel a, a pa hi Stoke leh Southampton midfielder hlui Rory Delap niin, ani erawh Republic of Ireland tan game 11 a inlan a ni.

England football-a player naupang talent nei tha tak Delap hian Stamford Bridge-ah hmun a chan ngei a rinawm.

Enzo Maresca chuan number 9 player Nicolas Jackson chiah a nei a, Delap hi an player mamawh tak a ni tih a chiang.