Brazil club Atletico Paranaense tan game 20 vel chauh a khel, goal khat chiah a la khung zui. Kum 19 mi lek Brazilian attacking midfielder hi engvangin nge Chelsea chuan Real Madrid, Monaco leh Hamburg te hmakhalhin £4.5 million chuan an lak ve ringawt ?
Hemi kan chhan hma hian a chanchin hmasa lam bih lawk teh ang. Nathan Allan de Souza hi March ni 13, 1996 khan Blumenau, Brazil-ah a lo piang a. Naupang harh vang tak a ni. Football khelh chu a tuina ni mahse Brazil club Atlético Paranaense-a a luh dan kawng erawh a danglam hle.
Street football khel thin a ni a, futsal lamah lut chhovin, Brazil rama scout tha ber zinga an chhiar pakhat Klaus Camara, tuna Champions Cruzeiro tana thawk mek chuan a chhar hlauh mai. Camara hian Atlético Paranaense-a a luh tir hmain thla 6 ngawt Nathan i a nghak a ni.
Under 17 World Cup 2013 khelh a nih hma daih tawh khan Brazil National team coordinator hlui Alexandre Gallo chuan player ropui tur a nih thu a lo sawi tawh. Nikum hmasa United Arab Emirates-a Under-17 World Cup-ah khan ropui takin a khel a, game 5 khelin goal 5 a khung. Nikum atang khan Brazil Under 20 tan khel tanin, game 14 atangin goal 3 a khung a ni.
A hmabak a eng hle
Football-ah talent tha tak a neih avangin a pa Jose Carlos de Souza pawhin a beisei sang hle a. Chuvang chuan a eizawnna dang zawng zawng kalsanin a fapa Nathan chu a buaipui ta chawt a ni. Europe-a Football hmanga ei zawng turin Jose Carlos de Souza chuan a fapa Nathan chu a duh, a thiam dan danin a fapa chu a buaipui a. Brazilian super agent Giuliano Bertolucci leh mi hausa Kia Jooarabchian te nen an intawng ta nge nge.
Brazil-a a khelhna Atletico chuan contract thar ziahpui tumin an hauh na hle, Nathan chuan contract thar a ziah duh hrih tak loh avangin Atletico hian match an khelh tam tir duh ta bik lova, a hun tam zawk chu Under 20 lamah an hman tir. Chutih laiin Age level-ah ram tan a chet dan khawvelin an hmu tawh si a. Club lian Real Madrid, Monaco leh Hamburg ten dawr ve bawk mahse Chelsea in sum tam tham takin Atletico chu an dawr ta thut mai.
He indawrna a thlen theihna tur hian neihthinglungkhawng tak meuhvin a pa hi Europe-ah vawi 5 dawn lai a zin hman. Tichuan sum tam tak Nathan lak chhuah nan Chelsea hian Atletico an pek dawn takah chuan Atletico tan chuan hnar rual a ni ta lo. Chelsea chuan kum 19 mi lek attacking midfielder chu an chang thei ta a ni.
Chelsea-in naupang talent nei tha an nei ta e.
June thla hian Chelsea chuan US-ah Tour an nei dawn, hetah hian official takin Nathan hi tlangzarhna an nei dawn. Chelsea hian Brazilian an kawl nual, Willian, Oscar, Ramires leh Lucas Piazon te kiangah Europe-ah ei a zawng tan ve tawh dawn. Thenkhat chuan New Oscar an lo ti hman leh tawh. Oscar ang em em chuan a che rang lo, mahse thatna deuh a nei, chu chu ball pass a thiam em em hi a ni.
A mit a fing a, a ball pet a dik a, Street football a khelh thin avangin ball a thiam hle, zim tak karah pawh duh thalin ball a khawih thei. 5ft 10in a sang a ni a, a taksa a inphut chho mek, physical tak pawhin a la tha dawn chiang. Mahse harsatna Premier League-ah chuan a neih ngei rin a ni.
A che rang lo ber hi a harsatna tur chu a ni a, chutianga che muang em em a ni kan tihna a ni lo, Neymar te, Oscar te leh Hazard te anga che rang a nih loh avangin Premier League game physical leh rangah chuan Nathan hian harsatna a tawk ngei ang le. Chuvang chuan Chelsea chuan season hnih khat chu loan-a an chhuah tir rin a ni.
Europe-a a kal theih nana sponsor tute chuan Portugal lamah Europe-a a hun hmasa lam hmang turin an duhsak, chuvang chuan Chelsea pawh hian an chang lo teuh hle nghe nghe a nih kha. Portuguese club Benfica chuan he rawlthar hi an zui ve reng a, chuvang chuan Primeira Liga Champions kiangah hian Europe-a a hun hmasa loan-a a hman rin a ni.