English club sum ngah Chelsea leh French club sum ngah Paris Saint-Germain te chuan Inter Milan wing-back Achraf Hakimi chu an inchuh mek.

Chelsea leh PSG te hian Hakimi hi lakluh an tum ve ve a, Inter hnenah hian an dawrna pawh thehlut tawhin, club hnihte hi sum nga tak ve ve an ni bawk nen thil awm zel dan tur a ngaihnawm chho dawn hle in a lang.

PSG hian Hakimi manah hian pound maktaduai 56.1 (euro maktaduai 60) an thehchhuaka, heti zat chiah hi Chelsea pawhin vawiin khan Hakimi manah hian an thehlut ve nghal.

Sky Italia chuan Inter hian Chelsea lam an awn deuh zawk niin an tarlanga, hei hi a chhan nia lang chu Chelsea hian Hakimi manah hian Emerson emaw Andreas Christensen emaw pek tel an phal vang nia sawi a ni.

Inter hian Serie A lama lo tlangnel sa Emerson hi an duh a, mahse loan-a lak an duh a, Chelsea erawh hian a ngheta chhuah tir an duh ve thung niin tarlan a ni bawk.

Chelsea leh PSG te hian Hakimi manah hian euro maktaduai 60 thehchhuak mahse, hei hi Inter chuan an duh khawp lo niin sawi a ni a, Inter hian an wing-back manah hian pound maktaduai 68.8 (euro maktaduai 80) an duh nia sawi a ni thung.

Kum 22 mi Hakimi hian season liamta khan Inter tan goal 7 a khung bakah, assist 10 a nei bawka, Inter-in Serie A title an lakna kawnga an player pawimawh tak a ni a, nikum mai khan Real Madrid atangin Inter hian pound maktaduai 40 bawr vel sengin an lalut a ni.