London club hian player lar leh tha sa aiin rawlthar lam tun nipui chu an thur a, Jose Mourinho-a'n season liamta khan, "Kan hmalam hun atan team kan din mek a, tun season-ah kan tan." a tih khan an kalpui tak tak dawn niin a lang.
Brazilian midfielder Nathan an lalut tawh a, tunah striker lam an melh leh thung a Fluminense striker Kenedy an lalut fel leh lek lek tawh niin tarlan a ni.
Kum 19 mi Kenedy hmingpum hi Robert Kenedy Nunes do Nascimiento a ni teh duah a, attacking midfielder emaw forward ang pawhin chhawr theih a ni a Brazil Under-20 tan game 7 khelin goal khat a khung tawh.
CLUB LIAN INCHUH
European club thenkhat pawhin Brazilian rawlthar hi an hmu tai hle a, a bikin Chelsea leh Manchester United-in an inchuh deuh a Jose Mourinho team hian an chang dawn niin a lang.
A khelh mekna Fluminense hian an chelh reng thei dawn lo tih an hria a, naupang hle mahse aman an chhiar hniam lo va £5m ai tlawm chuan hralh an tum lo.
Kum 2013 khan Kenedy hian Brazil chhuahsan a hreh lo tih a sawi a, Chelsea-a luh a hnial loh thu a sawi.
2013 Under-17 South America Championship-a goal khung hnem ber hian, "Fluminense tana khelh hi ka lawm tawk a, mahse ka tum chu engtikah emaw Europe-a inkhelh ve a ni."
"Oscar leh Ramires-te vangin Chelsea hi ka duh a, an team pumpui hi ka ngaina." tiin alo sawi tawh a, England panin Premier League champion hi zawm a hreh lo.
TAWNHRIAT A NEI NUAL TAWH
Fluminense scout-te'n hmu fuhin an club-ah an lalut thuai a, he club hi Brazil captain Thiago Silva bakah Rafael leh Fabio Da Silva-te unau chherchhuaktu an ni.
Kenedy hi Fluminense rawlthar team lamah an dah deuh reng hnuin first team-ah an suan chhova, Brazil striker Fred kiangah khelin Fluminense youth director Marcelo Teixeria pheichuan a hmasawn dan a hmuhin a fak hle.
Under-17-ah kum 2013 South America Championship khan goal ruk khungin goal khung tam ber a ni a, nikum khan Brazilian Serie A-ah game 20 khelin goal hnih a khung a, game 20 zingah game 18-ah hian inkhel bul a tan lo.
A KHELHDAN
Kum 16 mi anih chhohin Kenedy hi Neymar nen khaikhin an ni a, ke veilam hmang thiam a ni a, a che rangin ball a lalut ngam thin.
Alo upat deuh hnu hian Zenit St Petersburg forward Hulk nen khaikhin an ni veleh a, tharum ngah niin a larna ber erawh a chet ranna ala ni reng.
Chelsea player pahnih Ramires leh Willian-te hi an thawkrim hle tih tarlan a ni a, nawr lam ngaina ni mahse an manager Mourinho berin invenhim lam a ngaina si a an tlan let tam hle. Kenedy pawh hian nawr ringawt engto lovin goal venhim lam pawh a thiam tel chu a ngai ngei ang.
A BUAI ANGEM?
Chelsea hian Brazilian player an kawl nual a, Kenedy hi a mikhual lutuk lo ang. Mahse kum 19 chauh ala ni work permit nei mahse dan awmsa a awm avangin Premier League-ah a khel nghal ngawt thei dawn lo va loan-a chhuahtir mai a finthlak ang.
The Blues hian Dutch club Vitesse Arnhem-ah an rawltharte loan-in an khelhtir tam a, Kenedy pawh hi an thawn lut leh maithei.
Kenedy hian Chelsea a zawm anih chuan first team-a hmun chang turin a tlem berah kum khat emaw kum hnih tal chu a nghah a ngai ngeiin a rinawm.