Premier League inkhelah Liverpool chuan Anfield-ah Chelsea an lo mikhuala, Liverpool hi si hnih faia chakin, champion an tumna kawngah point thum hlu em em an hlawhchhuak.
Liverpool tan hian an goal thun khawl pahnih Sadio Mane leh Mohamed Salah-te chuan goal an khunga,game li khelh tur la neiin team tha tum tur Liverpool hian an nei tawh lova, an champion lovang tih a sawi theih loh.
Liverpool hian khelh 34-ah point 85 lai hlawhchhuak tawhin league hmahruaitu an ni a, pahnihnaa awm Manchester City aiin point hnihin an sanga, khelh khatin an khel tam zawk. Chelsea hian khelh 34-ah point 66 nei tawhin palinaah an awm chhunzawm zel rih.
Sawi tawh angin Liverpool hian team tha tum tur an nei tawh lova; relegation zone-a awm Cardiff, tla tawh sa Huddersfield, 15-naa awm Newcastle leh pariatnaa awm mek Wolves-te an la hmachhawn dawn. Heng zingah hian Wolves hi hautak ber tura ngaih an ni. Manchester City lam hian Chelsea lakah an beisei an ti sang hle in a rinawm a, mahse Chelsea hian Liverpool hi point an chhuhsak thei ta lo.
Liverpool 2-0 Chelsea
(Mane 51’, Salah 53’)
PLAYER RATINGS
LIVERPOOL: Alisson 7, Alexander-Arnold 8, Matip 8, Van Dijk 7, Robertson 7, Fabinho 8, Henderson 8, Keita 7, Mane 8, Firmino 7, Salah 8. Subs: Wijnaldum 6, Milner 6, Shaqiri n/a.
CHELSEA: Kepa 7, Azpilicueta 7, Rudiger 7, Luiz 7, Emerson 7, Kante 7, Jorginho 6, Loftus-Cheek 6, Willian 6, Hazard 7, Hudson-Odoi 6. Subs: Christensen 6, Higuain 6, Barkley n/a.
Match Report
Liverpool hian 4-3-3 formation an hmanga, khawvela goalkeeper manto ber dawttu Alisson Becker chuan si ban a nghak. Defence-ah Trent Alexander-Arnold, Joel Matip, Virgil Van Dijk leh Andy Robertson-te awmin, midfield-ah Fabinho, Jordan Henderson leh Naby Keita-te dah an ni a, tlar hmaa Salah, Mane leh Roberto Firmino-te an intlar bawk.
Chelsea hian 4-3-3 formation bawk an hmanga, khawvela goalkeeper manto ber Kepa Arrizabalaga chuan goal vengin, defence-ah Cesar Azpilicueta, Antonio Rudiger, David Luiz leh Emerson-te dah an ni. Midfield-ah manager Maurizio Sarri-a fachuam Jorginho chuan a ho leh a, a bulah Ruben Loftus-Cheek leh N’Golo Kante-te dah an ni. Tlar hmaah Eden Hazard chu false 9 –ah khelh tir niin a sirah Willian leh Callum Hudson-Odoi te chuan an thlawp.
Inkhel tan a ni a, mual neitu lam Liverpool an khel tha nghala, Chelsea lam an nawr na hle. Minute nga vel chauh khelh a nihin Mane chuan Salah tan ball a cross a, Salah hian lo pet mahse duhthu a sam lo hle a, Kepa tan thil harsa a ni lo. Minute sawm chuang khelh a nihin Salah chuan Willian a paltlang hnuah Luiz paltlang a tum ve leh a, Luiz hian Egyptian player hi an box chhungah a ti tlu a, Liverpool lamin penalty an hmuh inbeisei hle mahse referee-in a pe lo.
Darkar chanve vel khelh a nihin Willian chuan ball a khalha, box pawn deuh chiah atangin Liverpool goal lamah pet mahse goal a zawn lo deuh. Half time hma minute nga vel a awmin, Loftus-Cheek chu ball chhuhsak a ni a, Salah chuan Mane pe in, Mane hian yard 10 vela hla atangin ball hi pet nghal mahse a goal lo chiah chiah. Hemi hnu lawk hian Chelsea defender Rudiger chu a inhliama, lak chhuah niin Andreas Christensen chu a aia dah luh a ni. First half-ah goal lut awm lovin 0-0 in tihtawp a ni.
Second half tan a ni a, engkim a danglam chho. Liverpool in Chelsea an nawr na zual em em a, Chelsea in Liverpool an hneh thlawt lo a ni ber. Half time tan atanga minute rukah Liverpool in hma an hruai ta nge nge a, Chelsea box chhung dinglam atangin Henderson chuan far post lamah ball a vawrh a, hei hi far post-a changtu nei lo Mane chuan Chelsea goal-ah a lo tauh lut.
Mane-a goal khung atanga minute hnih hnuah Liverpool-in an goal hnihna an khung leh nghal; Salah chuan mual dinglamah ball khalhin, yard 25 vela hla atangin Chelsea goal-ah mawi em em in ball a chhuih luta, Liverpool in 2-0 in hma an hruai.
Sarri chuan Liverpool laka khel tha lem lo tak Hudson-Odoi la chhuakin Gonzalo Higuain a dah luta, Chelsea game hi eng emaw chenah a danglam chho. Chelsea tan Hazard a khel tha em em a, mahse a thianten an thlawp zo lo a ni ber.
Darkar khat khelh a ni a, Liverpool defence hnunga nalh taka inpawt Hazard chu a kangin ball tha tak pek a ni a, Hazard hian pet mahse si ban a fuha, Chelsea an vanduaiin Liverpool an vannei hle. Hei hnu hian Hazard bawk chuan chance tha em em mai a hlah zui leh nghala, mual dinglam atanga cross ball tha tak lokal chu Hazard hian lo dawngin pet goal nghal tum mahse duh angin a pet fuh lova, Alisson chuan a lo save zui bawk.
Hazard-a’n chance tha tak tak vawi hnih a hlah hnu hian Liverpool goal hma deuh lawkah Higuain chuan chance tha tak a nei ve leh bawka, mahse hlauhawmah a chhuah lo. Liverpool hian si hnih fai laiin hma hruai mahse Chelsea an nawr bet renga, chance pawh insiam hnemin, Chelsea hian goal hnih aia tam a chhuah teuh thin hle. Goal khung belh thei an awm tawh lova, Liverpool hi si hnih faia chakin kum 2012 hnuah a vawi khat nan Chelsea chu Anfield-ah an hneh leh a ni.