Arsenal chuan zanin zanlai dar 1:45-ah Chelsea chu Stamford Bridge-ah an tlawh dawna, Arsenal manager Mikel Arteta chuan top 4-ah an awm duh a nih chuan Chelsea lakah hnehna an chan ngei ngei a ngai dawn tih a sawi.

Tunah hian Arsenal hian khelh 23-ah point 29 an hlawhchhuak tawha, 10-naah awm mekin Chelsea nen hian point 10-in an inthlau meka, Arsenal hi English team tha zual paruk zingah an hniam ber.

Chelsea leh Arsenal-te hi thla hmasa ni 29 mai khan Emirates Stadium-ah an lo inhmachhawn tawha, hetah hian Chelsea chu 2-1 a chakin Arsenal hian Stamford Bridge-ah hnehna chan ve ngei an tum hle dawn.

Arteta chuan, “Chelsea kan tum tur hi top 4-a awm kan duh avangin inkhel pawimawh tak a ni dawna, kan home-a kan inkhelh tum kha thil nasa tak danglam thei a ni a, kha pawh kha inkhel pawimawh tak a ni. Chelsea lakah hian hnehna kan chan ngei ngei a ngai a ni,” a ti.

Emirates-a an inkhelh tum hian Arsenal chuan si khat faia hma an hruai reng hnuah Chelsea chuan hun tawp lamah minute 7 chhungin goal hnih an khunga, Arsenal lehthalin point thum an hawn.

Emirates-a Chelsea nen an inkhelh chungchang sawiin Arteta chuan, “A tir darkar chanve chhung vela kan khelh danah khan ka lung a awi hle a, tharum kan ngaha, kan nawr em em a, pressure nasa tak kan pe. Chu chu kan khelh duh dan a ni a, mahse a hnuah kan tla hniam ta deuh.

“An khelhdan an thlaka, khami avang khan khelhpui harsa kan ti ta deuh a, kan defence line a hnung telh telha, goal kan chhuah lova mahse hlauhawm chang kan nei leh thin. Inkhel chhung zawnga tan mar pat kha a har em em a, mahse Chelsea lakah chuan chu tak chu kan tih a ngai a ni,” a ti.