Nipui bazar inhawn hunah, Chelsea chuan player an lakluh theih nan inhralh chhuah nual an tum niin chanchinbu mite chuan an tarlang.

Chelsea hian nikum nipui khan sum tam tak an senga, pound maktaduai 200 chuang lai sengin, an sen man chu tun season-ah kan hmu meka, FA Cup leh UEFA Champions League final an lut ve ve tawh.

Chelsea hian kumin nipuiah pawh an squad thawm that an la tum zel niin a langa, chumi atan chuan an player neih sa eng emaw zah chu hralh an tum niina langa, Marcos Alonso leh Emerson te chu hralh tur zinga langsar ber an ni mek.

Chelsea hian nikum khan pound maktaduai 50 sengin English left-back Ben Chilwell an laluta, hemi hnu hian Alonso leh Emerson te hi an khel tlem zual hle a, an pahnih a nih loh pawhin a tu emaw zawk zawk hi chu Chelsea hian nipuiah an hralh ngei a rinawm.

Chelsea manger Thomas Tuchel chuan kumin January thlaa Chelsea a enkawl tan tir khan Alonso hi rawn chhawr leh viau mahse, tunah erawh a chhawr tlem leh ta hle a, Chelsea hian Alonso leh Emerson te hi hralhin, Chilwell-a thachhangdawltu tur an lak mai zawk te a rinawm a ni.

Chelsea hian Alonso leh Emerson bakah hian an player chhuah tir then nual an tum nia sawi niin, player eng emaw zat loan-a an chhuah a rinawm bawka, Chelsea hi player thar lakluh nan an inpaih thawl hle dawnin a lang  a ni.