12 Jul 2018 09:49

inkhel

Chelsea in Sarri an hnaih zel

Chelsea chuan an duh ber Maurizio Sarri chu an la thei ta nge nge dawn niin a lang. Chelsea leh Sarri-te hi an inbiak fel thuai rin a ni a, Antonio Conte pawh Chelsea hian an ban thuai a rinawm.

Napoli president Aurelio de Laurentiis chuan Sarri hi Chelsea-a a kal tur thu sawiin, “ Sarri hi Chelsea manager thar a ni tep tawh. Kan ukil-te tih fel ngai ti fel turin an inbe mek a ni.” a ti.

Sarri hi season zawh rualin Chelsea hian lak an tum nasa hle a, an la fel mai dawna a lan laiin, engmah tihfel a ni thei lo. Napoli lam hian Chelsea boss hlui Carlo Ancelotti chu an manager thar turin an lalut a, Sarri an ban chuang lo. Buaina a awm neuh neuh va, thawm pawh a reh hman viau. Inbiakna a kal zela, Napoli leh Chelsea-te hi an inrem ta nge nge a ni.

Chelsea player World Cup khel ve lo ten Conte-a hovin training an zawm mawp mawp tawha, mi tam takin Conte an ruai chhunzawm mai pawh an ring hman.

Sarri hian kum eng emaw zat Italian club-ah hian contract a la nei a, Chelsea hian an la ngawt thei lova, Napoli phalna zata an khul chhuah a ngai. London club hian Napoli phut zat hi an pe duh lova, hun rei tak an inbiak hnuah an inrem ta a, engzatin nge an inrem erawh hriat a la nilo. Hun rei nghah a ngaih tawh a rinawm loh va, Chelsea hian Sarri an lak thu leh Conte an ban thu hi an puan thuai a rinawm.

Sarri hi manager lar em em a ni ngai lova, Empoli a enkawl laiin Serie B atangin Serie A-ah a kai pui. Napoli a enkawl hnu hian mi hriat a hlawh tan a, season liamta phei kha chuan in Napoli hian Serie A-ah Juventus chiah um pha lovin point 91 lai an hmu a ni.

Sarri hian attacking game a ngaina hle a, Napoli khel pawh hi a mawi thin viaua, pundit tam takin Europe-a khel mawi ber an lo ti hial thin a ni.