11 Feb 2019 05:40

inkhel

Chelsea in Richarlison lei an rilruk

Chelsea chuan nipui transfer window inhawn hunah Richarlison chu Everton atanga lak chhuah an tum niin thawm a awm a, Chelsea hian Brazilian star hi an lei dawn a nih chuan £80 million vel tal an theh chhuah a ngaih hmel hle.

Richarlison hi tun hnaiah club hrang hrangin an hmutai hlawm hle a, AC Milan, Paris Saint-Germain leh Atletico Madrid te chu a langsar zual an ni a. Hetih lai hian Chelsea chu chet lak tum anga an sawi rik hmasak ber an ni thung a ni.

Kum 21-a upa Richarlison hian nikum nipui lai khan Watford atangin Everton hi a zawm a, a boss hlui Marco Silva nen inhrawn leh tur hian Everton chuan £40 million vel bawr an seng niin an sawi a. Goodison Park-ah season khatna a hmang mek a, tun season kal mekah Premier League goal 10 chu a thun tawh a, a khelh hmasak berah Wolves lakah goal hnih a thun nghal nghe nghe a ni.

Tun season-ah a che tha chho bawk a, ram tana khel turin an ko tan bawk a. Brazil leh USA an inkhelh tumin Roberto Firmino thlakin an ram tana a game hmasa ber hi a khel a. Bul a tan atanga ni li naah El Salvador nen an inkhel leh a, hemi tum hian ram tana a goal hmasa ber a thun zui a. Tun hnaiah tlemin a chet fuh a kal tluang lo deuh a, Silva chuan Manchester City nen an inkhelh pawh khan substitute bench lamah a awmtir a ni.

Kar tawpa Watford nen an inkhelh khan bul a tan ve leh tawh a, beisei a la pha chiah lo a, minute 66-ah an thlak zui a. He inkhelah hian Everton chu a chak lo zawkah an tang zui a. Mahse, Everton chu tun season chhunga Richarlison chet danah an lungawi hle tho a, Brazilian star lei chhuah dil tumte chu theihtawp chhuaha hnar zel an tum thu an sawi.

Marco Silva chuan Watford a enkawl laiin Richarlison hi a lei a, tunah Everton a enkawl laiin a lei leh bawk a. Tun hnaiah Everton hi an chet fuh loh chhoh em avangin Marco Silva dinhmun hi a derthawng tan niin an sawi a, club-in Silva hi an ban a nih chuan Richarlison pawh hian hmun dang pan mai a duh a rinawm ve thei a ni.

Chelsea chuan tun atangin Richarlison hi an ngaihven tan a, Real Madrid pana Eden Hazard a chhuak ta a nih phei chuan Brazilian star hi lak ngei an duh a rinawm hle.